Prezıdenttikke kandıdattardyń shtab ókilderine arnalǵan oqytý semınary uıymdastyryldy

ASTANA. QazAqparat - QR Ortalyq saılaý komıssııasy Prezıdenttikke kandıdattardyń saılaýaldy shtabtarynyń ókilderine arnalǵan oqytý semınaryn ótkizdi, dep habarlaıdy QazAqparat QR OSK baspasóz qyzmetine silteme jasap.

Semınarda negizgi spıkerler retinde Ortsaılaýkom músheleri Sábıla Mustafına, Anastasııa Şegortsova, QR OSK apparatynyń bıýdjetti josparlaý jáne oryndaý bóliminiń meńgerýshisi, «Halyq bank» AQ Astana qalasy boıynsha fılıalynyń ókilderi Janar Rahımova, Janııa Dosbaeva, sondaı-aq «Astana qalasy ákimi apparaty» MM qarjy-sharýashylyq bóliminiń basshysy Aınagúl Iksan sóz sóıledi.

Semınar qatysýshylaryna Prezıdenttikke kandıdattardyń BAQ-ta sóz sóıleýine respýblıkalyq bıýdjetten bólingen qarajat kólemi men tártibi, kandıdattyń saılaý qorlaryn qurý, saılaý qorytyndylary belgilengennen keıin qarajatty paıdalaný týraly esepterdi usyný, sondaı-aq kandıdattardyń barlyq qarjy operatsııalary men protsedýralaryn ashyq, ádil qamtamasyz etý týraly máseleler tolyq túsindirildi.

Saılaýaldy shtabtardyń ókilderi jarııaly saılaýaldy sharalardy ótkizý arqyly kandıdattardyń saılaýaldy úgitti júrgizý, onyń ishinde BAQ arqyly, baspa, aýdıovızýaldy jáne basqa da úgit materıaldaryn shyǵarý jáne taratýdyń quqyqtyq sharttarymen tanysty.

Kandıdattardyń saılaýaldy shtabtarynyń ókilderi tarapynan saılaý naýqany aıasynda qoıylǵan barlyq suraqtaryna semınardyń spıkerleri tolyq jaýap berdi.

Ortalyq saılaý komıssııasy kelesi semınary 2022 jylǵy 27 qazanda ÚEU Akademııasynyń alańynda ótetin saılaýdy ulttyq baıqaýdy júzege asyrý máseleleri boıynsha saıası partııalardyń, ózge de qoǵamdyq birlestikterdiń jáne kommertsııalyq emes uıymdardyń ókilderine josparlanǵan.