Prezıdenttikke kandıdattardyń saılaý qorlary «Qazaqstan Halyq jınaq bankinen» ashylatyn boldy - OSK-nyń otyrysy
ANA. 7 aqpan. QazAqparat /Aıdar Ospanalıev/ - Prezıdenttikke kandıdattardyń saılaý qorlary men ýaqytsha shottary «Qazaqstan Halyq jınaq banki» aktsıonerlik qoǵamynan ashylady.
Bul týraly búgin Ortalyq saılaý komıssııasynyń tóraǵasy Qýandyq Turǵanqulov atalmysh komıssııanyń otyrysynda málim etti.
Onyń aıtýynsha, elimizdiń barlyq óńirlerinde fılıaldary bar bul banktiń qyzmeti burynǵy saılaýlar kezinde de paıdalanylǵan.
Q.Turǵanqulov sondaı-aq sózinde Prezıdenttikke kandıdatqa rastalǵan 91 myń qol qajettigin atap kórsetti. Al kandıdatty qoldaýshylardyń qoldaryn senim bildirgen adamdary jınaıdy. Qol jınaıtyn toptar men olardyń adamdarynyń sany shektelmeıdi. «Kandıdatty qoldap, qol qoıylǵan paraqtar aýmaqtyq saılaý komıssııalaryna tapsyrylady. Ol komıssııalar qoıylǵan qoldardyń rastyǵyn quzyrly organ ókilderiniń qatysýymen 10 kún ishinde tekseredi jáne tıisti hattama jasap, Ortalyq saılaý komıssııasyna jiberedi», - dedi OSK-nyń tóraǵasy.
