Prezıdenttikke kandıdattardyń aqparat quraldarynda materıal jarııalaý úderisinde tepe-teńdik saqtalyp otyr - OSK
ANA. 16 naýryz. QazAqparat /Aıdar Ospanalıev/ - Prezıdenttikke kandıdattardyń buqaralyq aqparat quraldarynda arnaıy materıal jarııalaý sharasynda tepe-teńdik saqtalyp otyr.
Bul týraly búgin Ortalyq saılaý komıssııasynyń tóraǵasy Qýandyq Turǵanqulov jýrnalıstermen bolǵan brıfıngte aıtty.
«Ortalyq saılaý komıssııasy Prezıdenttikke kandıdattardyń materıaldarynyń buqaralyq aqparat quraldarynda jarııalaný jaǵdaıyna monıtorıng júrgizip otyr. Sońǵy ýaqytta kandıdattardyń elektrondy aqparat quraldary men baspasóz basylymdaryndaǵy materıaldary merzimi men kólemi boıynsha birdeı jarııalanýda»,-dedi OSK tóraǵasy.
Onyń sózine qaraǵanda, Ortalyq saılaý komıssııasy aýmaqtyq jáne ýchaskelik saılaý komıssııalary úshin aqparattyq-ádistemelik jáne baǵyt-baǵdar beretin materıaldardy daıyndaý isin tolyq aıaqtady. «Biz Prezıdenttikke kandaıdattan bastap, senim bildirgen azamattarǵa deıingi adamdar bilýleri tıis 30-ǵa jýyq broshıýra men 8-ge jýyq plakat túrlerin daıyndadyq. Buǵan qosa taǵy 23 rolık shyǵardyq. Olar qalyń kópshilikke daýys berýdiń tártibin kórsetip, halyqty daýys berýge shaqyrady. Sonymen qatar 4-5 baspasóz basylymynda Ortalyq saılaý komıssııasynyń arnaıy betteri bar. Onda biz ózimizdiń túsindirý, aqparattandyrý baǵytyndaǵy málimetterimiz ben saılaý barysyna qatysty ózge de aqparattardy jarııalaımyz»,-dedi Q.Turǵanqulov.
