Prezıdenttikke kandıdattardy tirkeý 11 mamyr kúni aıaqtalady

NUR-SULTAN. QazAqparat - Aǵymdaǵy jyldyń 9 maýsymynda ótetin kezekten tys prezıdenttik saılaýǵa kandıdattardy tirkeý 11 mamyr kúni aıaqtalady. Bul týraly búgin QR Ortalyq saılaý komıssııasy tóraǵasynyń orynbasary Konstantın Petrov aıtty, dep habarlaıdy QazAqparat tilshisi.

Onyń sózinshe, kandıdattardy tirkeý aǵymdaǵy jyldyń 11 mamyry kúni saǵat 18-00-ge deıin jalǵasady. Kandıdat retinde tirkelý úshin usynylǵan tulǵa 2019 jylǵy 1 sáýirdegi jaǵdaı boıynsha óziniń jáne jubaıynyń kiristeri men múlik týraly deklaratsııalar tapsyrǵany jóninde memlekettik kiris organynyń anyqtamasyn, óziniń densaýlyq jaǵdaıy týraly medıtsınalyq qorytyndyny tapsyrýy qajet. Tapsyrylǵan deklaratsııalarda kandıdattyń kiristeri men múlki týraly málimetterdiń ras emestigi anyqtalǵan jaǵdaıda Ortalyq saılaý komıssııasy kandıdatty tirkeý kúshin joıa alady.

Prezıdenttikke kandıdattardy qoldaý oblystardyń, respýblıkalyq mańyzy bar qalalardyń jáne elordanyń keminde 2/3 bóligin teń dárejede bildiretin saılaýshylardyń kem degende 1 paıyzynyń qoldaryn jınaýmen rastalady.

2019 jylǵy 1 qańtardaǵy jaǵdaı boıynsha, QR OSK elimizde daýys berý quqyǵy bar 11 814 019 azamatty saılaýshylar tizimine qosqan. Osylaısha árbir kandıdatty qoldaý úshin 118 140 saılaýshynyń túpnusqaly qoly jınalýy tıis. Qol jınaýdy prezıdenttikke kandıdattardyń senim bildirgen adamdary uıymdastyrady.