Prezıdenttikke kandıdattar M. Eleýsizov pen Ǵ. Qasymov úgit-nasıhat bılbordtaryn ornalastyrý úshin OSK-dan kómek surady
ASTANA. 16 naýryz. QazAqparat /Aıdar Ospanalıev/ - Prezıdenttikke kandıdattar Mels Eleýsizov pen Ǵanı Qasymov Ortalyq saılaý komıssııasynan Almaty men Astana qalalarynda jáne elimizdiń birqatar oblys ortalyqtarynda ózderiniń saılaýaldy úgit-nasıhat jumystaryn júrgizý úshin syrtqy jarnama men bılbordtar ornalastyrýǵa kómek kórsetýdi surap otyr.
Bul týraly búgin Ortalyq saılaý komıssııasynyń tóraǵasy Qýandyq Turǵanqulov jýrnalıstermen bolǵan brıfıngte málim etti.
Onyń sózine qaraǵanda, kandıdattarda birshama qarjy paıda bolǵan bolýy kerek, olar jarnama máselesin myqtap qolǵa almaq. «Alaıda osy sharany júzege asyrýshy mekeme bul jumysty birshama uzaqqa sozyp jibergen sııaqty. Biz tań atqaly osy ispen aınalysyp jatyrmyz. Biz, árıne jeke menshik ıelerine qatal talap qoıa almaımyz. Degenmen, biz olarǵa túsindirý jumystaryn júrgizip, saılaýaldy úgit-nasıhat sharalarynyń ýaqytynda atqarylýy tıistigine kóz jetkizýge tyrysamyz. Bul máseleni biz sheshe alamyz degen oıdamyn. Bálkim jýyq arada Astana men Almatyda jáne birqatar oblys ortalyqtarynda atalmysh kandıdattardyń jańa bılbordtary men jarnamalary boı kóterip te qalar»,-dedi OSK tóraǵasy.
