Prezıdenttikke kandıdatqa saılaýaldy sharalarǵa qansha qarajat bólinedi

ASTANA. QazAqparat – QR Ortalyq saılaý komıssııasynyń otyrysynda Qazaqstan Respýblıkasy prezıdenttigine kandıdattyń shyǵystar mólsherin belgileý týraly qaýly qabyldandy, dep habarlaıdy QazAqparat tilshisi.

Qaýly jobasyn tanystyrǵan Ortalyq saılaý komıssııasynyń múshesi Sabıla Mustafınanyń aıtýynsha, memleket prezıdenttikke úmitkerlerge buqaralyq aqparat quraldarynda óz baǵdarlamalarymen sóz sóıleý úshin qarajattyń teń bólinýine kepildik beredi.

Osylaısha, BAQ-ta baǵdarlamasymen sóz sóıleýge, ıaǵnı teledıdarda - 15 mınýt; radıoda -10 mınýt; merzimdi baspasóz basylymdarynda nemese jelilik basylymdarda 0,1 baspa tabaqtan aspaıtyn eki maqala jarııalaý úshin úmitkerge zańmen qarajat bólý qarastyrylǵan.

Budan basqa, respýblıkalyq bıýdjet qarajatynan kandıdattardyń saılaý aldyndaǵy jarııa is-sharalardy ótkizý; úgit materıaldaryn shyǵarý jáne kólik shyǵyndary jabylady.

Qorytyndysynda komıssııa músheleri «2022 jylǵy 20 qarashaǵa bekitilgen QR prezıdentin kezekten tys saılaýda respýblıkalyq bıýdjet qarajatynan óteletin Qazaqstan Respýblıkasy prezıdenttigine kandıdattyń shyǵystar mólsherin belgileý týraly» qaýly qabyldady.

Oǵan sáıkes úmitkerlerdiń shyǵystar mólsheri 10 312 600 teńge kóleminde belgilengen:

1. teledıdar jáne radıo boıynsha baǵdarlamalarmen sóz sóıleý, sondaı-aq merzimdi baspa basylymdarynda 2 maqala jarııalaý - 9 012 600 teńge;

2. saılaý aldyndaǵy jarııa is-sharalardy ótkizý jáne úgit materıaldaryn shyǵarý - 800 000 teńge;

3. kólik shyǵyndary - 500 000 teńge.