Prezıdenttikke kandıdat retinde tirkelý úshin qandaı qujattar tapsyrý kerek
Otyrysta atalǵan másele boıynsha baıandama jasaǵan QR OSK múshesi Baqyt Meldeshovtiń atap ótýinshe, prezıdenttikke úmitker kandıdat retinde tirkelý úshin Ortalyq saılaý komıssııasyna eki qujat usynatyn bolady.
"Birinshi, memlekettik kirister organdaryna kandıdattyń jáne onyń zaıybynyń (jubaıynyń) tabysy men múlki týraly salyq deklaratsııasyn tapsyrǵany týraly salyq organdarynyń anyqtamasyn usynýy kerek. Ekinshisi - densaýlyǵynyń jaı-kúı týraly medıtsınalyq qorytyndy usyný. Atalǵan mindetter "Qazaqstan Respýblıkasyndaǵy saılaý týraly" QR Konstıtýtsııalyq zańynyń 59-baby 5-tarmaǵy 4, 2, 6 tarmaqshalaryna negizdelip kórsetilgen"", - dedi ol.
Onyń aıtýynsha, Saılaý týraly zańnyń 59-babynyń 2-tarmaǵynda kandıdattyń jáne onyń zaıybynyń (jubaıynyń) turǵylyqty jeri boıynsha memlekettik kirister organdaryna usyný merzimi bastalǵan aıdyń birinshi kúnindegi, ıaǵnı 2019 jylǵy 1 sáýirdegi kiristeri men múlki týraly deklaratsııany usynýy kózdelgen. Ortalyq saılaý komıssııasyna Memlekettik kirister organynyń kandıdattyń jáne onyń zaıybynyń (jubaıynyń) kiristeri men múlki týraly deklaratsııalardy tapsyrǵany týraly anyqtamasy kez kelgen ýaqytta Prezıdentikke kandıdatty tirkeý merzimi aıaqtalǵanǵa deıin, ıaǵnı 2019 jylǵy 11 mamyrǵa deıin usynylady. Kandıdat anyqtamany usynbaǵan jaǵdaıda tirkeýden ótpeıdi. Kandıdat tirkelgennen keıin Ortalyq saılaý komıssııasy kandıdat pen onyń zaıyby (jubaıy) deklaratsııalaǵan kiristeri men múlki týraly málimetterdiń durystyǵy týraly suraý salýdy ýákiletti organǵa jiberedi, ony kandıdat tirkelgen kúnnen bastap on bes kún ishinde memlekettik kirister organdary tekseredi.
"Bul rette memlekettik kirister organdarynyń kandıdattyń jáne onyń zaıybynyń (jubaıynyń) kiristeri men múlki týraly málimetterdi usyný týraly talaptaryn alǵan uıymdar talapty alǵan kúnnen bastap tórt kún ishinde suratylǵan aqparatty berýge mindetti. Deklaratsııany berý kezinde kandıdat nemese onyń zaıyby (jubaıy) deklaratsııalaǵan kiristeri men múlki týraly málimetterdiń durys emestigi anyqtalǵan jaǵdaıda Ortalyq saılaý komıssııasy tirkeý týraly sheshimniń kúshin joıady", - dedi OSK múshesi.
Sonymen qatar ol «Qazaqstan Respýblıkasyndaǵy saılaý týraly» Konstıtýtsııalyq zańynyń 59-babynyń 2-1-tarmaǵyna sáıkes Qazaqstan Respýblıkasynyń Prezıdenttigine kandıdat tirkelgenge deıin densaýlyǵynyń jaı-kúıi týraly medıtsınalyq qorytyndyny Ortalyq saılaý komıssııasyna mindetti túrde usynatyndyǵyn aıtty.
Osy normaǵa sáıkes Prezıdenttikke kandıdattyń Respýblıka Prezıdentiniń mindetterin oryndaýyna kedergi keltiretin aýrýlarynyń joqtyǵyn rastaý úshin oǵan medıtsınalyq kýálandyrý júrgiziledi. Onyń qorytyndysy densaýlyq jaǵdaıy týraly tıisti medıtsınalyq qorytyndymen resimdeledi. Medıtsınalyq qorytyndyǵa qoıylatyn talaptardy jáne Respýblıka Prezıdenttigine kandıdat bolyp tirkeýge kedergi keltiretin aýrýlardyń tizbesi, Ortalyq saılaý komıssııasy men densaýlyq saqtaý salasyndaǵy ýákiletti organ - Densaýlyq saqtaý mınıstrligimen birlesken normatıvtik quqyqtyq aktisimen belgilenedi", - dedi Baqyt Meldeshov.
