Prezıdenttik jastar kadr rezerviniń 60%-y jumysqa ornalasty – agenttik

NUR-SULTAN. QazAqparat – Prezıdenttik jastar kadr rezervine iriktelgen mamandardyń 60 paıyzy eńbekpen qamtyldy. Bul týraly QR Memlekettik qyzmet isteri agenttiginiń tóraǵasy Darhan Jazyqbaev málim etti, dep habarlaıdy QazAqparat tilshisi.

«Agenttik strategııalyq qujattardy, Memleket basshysynyń tapsyrmalaryn, Prezıdent joldaýlarynda qoıylǵan negizgi mindetterdi júzege asyrý boıynsha júıeli jumys istep keledi. Ótken jyly agenttik memlekettik apparat qyzmetin ońtaılandyrý, memlekettik qyzmetshilerdiń áleýmettik jaǵdaıyn jaqsartý, memlekettik qyzmetke neǵurlym básekege qabiletti jáne daryndy jastardy tartýǵa baǵyttalǵan birqatar is-sharalardy júzege asyrdy. 2021 jyly agenttik prezıdenttik jastar kadr rezervine kezekti irikteý ótkizip, qorytyndysynda rezervke 50 adam qabyldandy. Alǵash ret prezıdenttik jastar kadr rezervi 2019 jyly uıymdastyrylyp, 300 maman iriktelgen edi. Qazirgi ýaqytta 350 adamnyń 209-y ıaǵnı 60 paıyzy jumysqa ornalastyryldy», - dedi Darhan Jazyqbaev agenttiginiń keńeıtilgen alqa otyrysynda.

Sondaı-aq, agenttik tóraǵasy atalǵan baǵyttaǵy jumystyń jalǵasatynyn jáne aldaǵy ýaqytta óńirlerdiń belsendiligine mán beriletinin aıtty.

«Prezıdenttiń tapsyrmasyna sáıkes kadrlardy iriktek júıesin jetildirý jáne memlekettik qyzmetten shyǵý tártibin jeńildetý boıynsha shara qolǵa alyndy. Bizge kadrlardy irikteýdiń ashyq ári ádil júıesin qalyptastyrý qajet. Memlekettik qyzmet salasyn damyta túsý úshin agenttik «E-qyzmet» júıesin jańǵyrtý jumysyn júrgizip jatyr», - deıdi ol.

Aıta keteıik, elordada onlaın formatta QR Memlekettik qyzmet isteri agenttiginiń keńeıtilgen alqa otyrysy ótip jatyr.