Prezıdenttik jastar kadr rezervine irikteý qalaı júredi

NUR-SULTAN. QazAqparat – QR Memlekettik qyzmet isteri agenttiginiń tóraǵasy Anar Jaıylǵanova Prezıdenttik jastar kadr rezervine ekinshi irikteýdiń negizgi kezeńderi týraly aıtyp berdi, dep habarlaıdy QazAqparat tilshisi QR Memlekettik qyzmet isteri agenttigine silteme jasap.

Onyń aıtýynsha, áleýetti rezervshilerdi irikteý 6 kezeńnen turady.

«Birinshi kezeń – úmitkerlerdiń qujattaryn qabyldaý arnaıy onlaın-platformada bıylǵy 1-30 qyrkúıek aralyǵynda júrgizildi. Ekinshi kezeń – 2-9 qazan aralyǵynda ótetin eki testileý blogynan quralǵan. Munda úmitkerlerdiń mátindik jáne sandyq aqparatmen jumys isteý qabileti baǵalanady. Úshinshi kezeńde – sıtýatsııalyq máseleler sheshiledi. 12-17 qazan aralyǵynda úmitkerlerdiń naqty problemalardy sheshýdegi kózqarasyn baǵalanady. Aldyńǵy irikteýde bul kezeńniń bolmaǵanyn atap ótkim keledi. ıAǵnı, qolda bar tájirıbeni eskere otyryp, kandıdattardyń kásibı qyzmetinde týyndaýy múmkin naqty máselelerdi sheshýge daıyndyǵyn tekserýdi uıǵardyq», - deıdi Anar Jaıylǵanova.

Al tórtinshi kezeńde – kásibı HR-menedjerlerdiń qatysýymen úmitkerlerdiń quzyretteri jóninde suhbat ótedi jáne assesment-ortalyq arqyly strategııalyq oılaý, proaktıvtilik, qyzmetti basqarý, komandalyq kóshbasshylyq sııaqty jańa formatsııadaǵy kóshbasshylarǵa tán birqatar minez-qulyq quzyrettiligi baǵalanady.

«Besinshi kezeńde qatysýshylar saraptamalyq komıssııada suhbattasýdan ótedi. Bul kezeńge irikteýdiń aldyńǵy kezeńderinde eń kóp upaı jınaǵan qatysýshylar jiberiledi. Prezıdent Ákimshiligi quratyn komıssııa irikteýdiń aldyńǵy kezeńderinen sátti ótken árbir úmitkermen jeke suhbattasady. Suhbat qorytyndysy boıynsha saraptama komıssııasy ashyq daýys berý arqyly rezervke usynylatyn kandıdattar tizimin jasaıdy jáne ulttyq komıssııanyń qaraýyna jiberedi. Al irikteýdiń qorytyndy kezeńinde – qatysýshylardyń kandıdatýrasy kadr rezervi jónindegi ulttyq komıssııada qaralady. Bul kezeńge saraptama komıssııasy usynǵan eń joǵary ball jınaǵan qatysýshylar jiberiledi. Komıssııa otyrysynyń qorytyndysy boıynsha kandıdattardy Prezıdenttik rezervke qabyldaý týraly sheshim qabyldanady, ol Prezıdent Ákimshiligi Basshysynyń buıryǵymen rásimdeledi», - dep túsindirdi agenttik tóraǵasy.

Aıta keteıik, Prezıdenttik jastar kadr rezervine qatysýshylardy tirkeý aıaqtaldy.

1 qyrkúıekten 1 qazanǵa deıin kadr rezervine qatysýǵa 8 638 adam ótinim berdi. Olardyń arasynda 5133 er adam jáne 3505 áıel bar.