«Prezıdenttik jastar kadr rezervi» jobasy Sıngapýrda tanystyryldy

NUR-SULTAN. QazAqparat – Memlekettik qyzmet isteri agenttiginiń ókilderi Sıngapýrde oqý kýrsynan ótti. Bul týraly QazAqparat Agenttikke silteme jasap habarlaıdy.

Memlekettik qyzmet salasyndaǵy Astanalyq habtyń qoldaýymen Sıngapýrdyń Memlekettik qyzmet kolledjinde ótken «8th Temasek Foundation International Governance & Public Administration Programme» oqytý kýrsyna qatysty.

Sıngapýrdyń ekonomıkasy 2019 jylǵy Dúnıejúzilik ekonomıkalyq forýmnyń Jahandyq básekege qabilettilik ındeksine sáıkes álemdegi eń básekege qabiletti dep tanylǵandyqtan, bul eldiń memlekettik basqarý jáne memlekettik qyzmetiniń tájirıbesin zerdeleý Agenttik úshin erekshe qyzyǵýshylyq týdyrady.

Azııa – Tynyq muhıt aımaǵynyń 9 elderiniń, sonyń ishinde Qytaı jáne Úndistannyń qatysýymen ótken baǵdarlama barysynda qazaqstandyq «Prezıdettik jastar kadr rezervi» jobasy tanystyryldy. Qatysýshylardy Prezıdettik jastar kadr rezervin qurý, irikteý úrdisteri men olardyń ashyqtyǵy, Qazaqstannyń talantty jastardy memlekettik qyzmetke tartý boıynsha tájirıbesi qyzyqtyrdy.

Sapar aıasynda Agenttik ókilderi Sıngapýrdyń memlekettik qyzmettiń adamı kapıtalyn damytý mindetin atqaratyn Sıngapýr Premer - Mınıstri Keńsesiniń joǵary laýazymdy tulǵasy Lım Pýaı-Se hanymmen ekijaqty kezdesý ótkizdi.

Lım Pýaı-Se hanym Prezıdenttik jastar kadr rezervin qalyptastyrýdyń ózektiligin atap ótip, talanttar pýlyn qurý boıynsha Sıngapýrdyń tájirıbesimen bólisti.

Lım Pýaı-Se hanymnyń aıtýynsha, Prezıdenttik jastar kadr rezervin qurý barysynda rezervısterdiń bastamalary men jobalaryn, memlekettik basqarýdaǵy jańa tásilderin memlekettiń damýy ıgiligine engize otyryp, olardyń áleýetin keńinen qoldaný qajet.

Esterińizge sala keteıik, «Prezıdenttik jastar kadr rezervin» qurýdyń maqsaty jastar úshin tıimdi ári ashyq áleýmettik lıft qurý bolyp tabylady.