Prezıdenttik Jańa jyl shyrshasynda 200-den astam balaǵa planshet syıǵa berildi
ALMATY. QazAqparat - Almatydaǵy Qabyldaý úıinde Qazaqstan Respýblıkasy Prezıdentiniń atynan Jańa jyldyq shyrsha ótti. Oǵan balalar úıleriniń 200-den astam tárbıelenýshisi qatysty, dep habarlaıdy QazAqparat tilshisi.
Shyrshaǵa erekshe qamqorlyqty qajet etetin, kópbalaly jáne turmysy tómen otbasylardyń balalary shaqyryldy. Memleket basshysy almatylyq búldirshinderge arnap arnaıy vıdeoúndeý joldady.
«Búgingi Jańa jyldyq shyrsha aınalasyna bizdiń úlken ári tatý elimizdiń balalary jınaldy. Ótip bara jatqan jylda senderdiń barlyǵyń bilim aldyńdar, sporttyq jarystarda jetistikterge jettińder, túrli konkýrstarda jeńimpaz atandyńdar. Senderdiń árqaısylaryń budan da bıik shyńdarǵa qulash sermedińder. Bul asyl qasıet senderdiń ǵana emes, barsha Qazaqstannyń kúsh-qýatyn arttyrady. Qymbatty balalar, Jańa jylda da senderdiń barlyq nıet-tilekteriń men armandaryń oryndalsyn», - dedi Nursultan Nazarbaev.
Tárbıelenýshilerge Elbasynyń atynan balalarǵa syılyq salynǵan arnaıy sómkeler berildi. Onyń ishinde qysqy kıimder, keńse taýarlarynyń jıyntyǵy, planshetter, oıynshyqtar men táttiler boldy.
Merekelik sharaǵa ertegi keıipkerleri Aıaz Ata men Aqsha qar, «Іsmer» ansambli, «KeshYou» toby, tsırk artısteri, MuratMuturǵanovtyń shoýy men X-Faktor jobasynyń fınalısteri jáne basqalary qatysty.
