Prezıdenttik ústemeaqy medıtsına mamandaryn yntalandyrady - elordalyq dáriger
NUR-SULTAN. QazAqparat - Dárigerlerdiń jalaqysyna qosylatyn prezıdenttik ústemeaqy óte mańyzdy qoldaýǵa aınaldy. Bul pikirdi elordalyq ftızıopýlmonologııa ortalyǵynyń dárigeri Maral Ábdirahmanova bildirdi, dep habarlaıdy QazAqparat tilshisi.
«Bizdiń bólimniń ujymyna keshe Prezıdent tapsyrmasymen taǵaıyndalǵan ústemeaqy berildi. Ujym atynan Memleket basshysy Qasym-Jomart Toqaevqa jáne Úkimetke alǵys aıtqym keledi. Barlyq dárigerler, medbıkeler, odan da basqa qyzmetkerler osyndaı qıyn kezeńde qarjylaı kómek alyp otyr. Olar munda kúndiz-túni jumys isteıdi,koronavırýstyq ınfektsııamen aldyńǵy shepte kúresip júr. Medıtsınalyq qyzmetkerlerdi úsh topqa bóldi, al eń joǵary qaýpite turǵan bizdiń ujymǵa 3 aı boıy 20 AEK kóleminde 850 myń teńge qosymsha tólendi. Oǵan deıin de Prezıdent tapsyrmasymen syıaqy túsken edi, bul medıtsınalyq qyzmetkerlerdi yntalandyrady», - dedi M. Ábdirahmanova QazAqparat tilshisine bergen suhbatta.
Qalalyq ftızıopýlmonologııa ortalyǵynyń mamandaryna basqa da qoldaý kórsetilip jatyr. Olar «Hilton» qonaqúıine ýaqytsha jaıǵasty jáne barlyq taǵammen, jumysqa baryp-keletin arnaıy kólikpen qamtamasyz etildi.
Sonymen birge, dárigerler arnaıy kıim, maska, kózildirik syndy qorǵanys quraldarymen jáne ımmýnıtetti nyǵaıtatyn dárýmendermen tolyq qamtyldy.
«Ortalyqta naýqastarǵa qajetti barlyq dári-dármek bar. Ortalyq dárigerlerine úzdik klınıka mamandary telefonmen jáne beınebaılanyspen konsýltatsııalyq kómek beredi. Memlekettiń osyndaı qoldaýy úshin qýanyshtymyz. Árıne, biz de indetti eńserýge bar kúshimizdi salamyz», - dedi M. Ábdirahmanova.
Eske sala ketsek, naýryz aıynyń sońynda TJ rejımin qamtamasyz etý jónindegi Memlekettik komıssııa epıdemııaǵa qarsy sharalarǵa atsalysqan medıtsınalyq qyzmetkerlerge ústemeaqy taǵaıyndady.
