Prezıdenttik ústemeaqy dárigerler eńbeginiń elengenin kórsetti - astanalyq dáriger
NUR-SULTAN. QazAqparat - Elordalyq kópbeıindi medıtsınalyq ortalyqtyń KVI bóliminiń meńgerýshisi Álııa Sársenova dárigerlerdiń jalaqysyna qosylatyn prezıdenttik ústemeaqy týraly pikir bildirdi, dep habarlaıdy QazAqparat.
«Bul joly bizdiń eńbekaqymyz 3 ese kóbirek tústi jáne qala ákimdiginen qosymsha syıaqy berildi. Odan bólek, koronavırýs ınfektsııasy naýqastaryn emdegenimiz prezıdenttik ústemeaqy tústi. Prezıdenttik ústemeaqy úsh aı boıy beriledi. Eńbegimiz elenip, osyndaı materıaldyq qoldaý kórsetkeni úshin Úkimetke jáne ákimdikke rızashylyǵymyzdy bildiremiz», - dedi bólim meńgerýshisi.
Onyń aıtýynsha, aýrýhanaǵa ortasha deńgeıdegi ókpe qabyný dıagnzymen naýqastar áli de kelip jatyr.
«Naýqastar sany áli azaıar emes. Aýrýhanada medıtsınalyq qorǵanys kıimderi, betperde, qolǵap, dezınfektsııalyq quraldar sany jetkilikti. Bizdiń qyzmetkerler qonaq úıde turyp jatyr. Tańerteń jáne keshke jumysqa aparyp-ákeletin avtobýs berilgen», - deıdi dáriger.
Eske sala ketsek, naýryz aıynyń sońynda TJ rejımin qamtamasyz etý jónindegi Memlekettik komıssııa epıdemııaǵa qarsy sharalarǵa atsalysqan medıtsınalyq qyzmetkerlerge ústemeaqy taǵaıyndady.
Qaýiptiligi boıynsha birini top mamandarynyń jalaqysyna aıyna 850 myń teńge ústemeaqy qosylady. Ekinshi top - provızorlyq statsıonar men jedel járdem qyzmetteriniń dárigerleri, orta jáne kishi medıtsına qyzmetkerleri. Olardyń ústemaqysy aıyna 425 myń teńgeni quraıdy. Úshinshi topqa karantındik statsıonar dárigerleri, orta jáne kishi medıtsına qyzmetkerleri, sanıtarlyq dárigerler,jedel járdem júrgizýshileri jáne taǵy basqalary kiredi. Olar aıyna 212 myń teńge ústemeaqy alady.
Respýblıka boıynsha 30 myńnan astam dáriger tıisti ústemeaqy alady.
