Prezıdenttik shyrshaǵa qatysýshylar úsh jyl boıy tegin kıine alady
ASTANA. QazAqparat - Astanadaǵy Oqýshylar saraıynda QR Prezıdenti Nursultan Nazarbaevtyń atynan balalarǵa arnalǵan jańajyldyq mereke ótti, dep habarlaıdy QazAqparat tilshisi.
Merekelik sharaǵa áleýmettik jaǵdaıy tómen, erekshe qamqorlyqty qajet etetin jáne ata-qamqorlyǵynsyz qalǵan 200-den astam bala qatysty. Barlyǵyna kitaptar men táttiler jáne ózge de syılyqtar tabystaldy.
«Prezıdenttik shyrsha merekesine qatysý úshin jyl saıyn Astananyń 84 mektebi men balalar úıi biz ataǵan talaptarǵa saı oqýshylardyń tizimin jiberedi. Al ákimdikte qurylǵan arnaıy komıssııa áleýmettik qıyndyqtarǵa, densaýlyq jaǵdaıyna qaramastan belsendi bolyp, ozat oqyp júrgen balalardy iriktep alady», - dep jaýap berdi Astana qalasy Bilim basqarmasynyń basshysy Ánýar Janǵozın.
Sondaı-aq, balalarǵa astanalyq kıim dúkeniniń úsh jylǵa jaramdy sertıfıkaty berildi.
«Jyl saıyn ata-analar balalarǵa oıynshyq pen táttilerden góri, kıim jaǵynan kómektesińizder dep ótinish bildiredi. Olardyń barlyǵyna birdeı kıim áperý de yńǵaısyz. Sondyqtan, balalarǵa táttiler men kitaptar jáne Astanadaǵy qysqy jáne jazǵy sapaly kıim satylatyn úlken dúkenniń 85 myń teńgelik sertıfıkatyn berýdi uıǵardyq. Sertıfıkat úsh jylǵa deıin jaramdy, ıaǵnı únemdep jumsasa, úsh jyl boıy mektep kıimin jańartýǵa bolady», - deıdi Janǵozın.
Aıta keteıik, bıylǵy prezıdenttik shyrsha merekesi Astananyń 20 jyldyǵyna arnaldy. Onda Aqshaqar men jeti ergejeıli jáne álemniń túpkir-túpkirinen kelgen keıipkerler Qabanbaı batyrmen tanysyp, Astanadaǵy erekshe ǵımarattardy tamashalady.
Sondaı-aq, QR Prezıdenti Nursultan Nazarbaevtyń qazaqstandyq balalardy jańa jylmen quttyqtaǵan vıdeoquttyqtaýy kórsetildi.
Prezıdenttik shyrsha toıynan soń balalar EKSPO-2017» kórmesi aýmaǵynda ornalasqan Nur Álem ǵımaratyna ekskýrsııaǵa attandy.
