Prezıdenttik shyrshada 200 balaǵa noýtbýk syıǵa tartyldy - OQO
ShYMKENT. QazAqparat - Búgin Shymkenttegi «Ońtústik Tsırk» ǵımaratynda «Biz - máńgilik el bolamyz!» taqyryby aıasynda QR Prezıdentiniń Jańa jyldyq shyrshasy ótti.
Bul týraly OQO ákimi apparatynyń baspasóz qyzmeti habarlady.
Saltanatty sharaǵa qatysqan oblys ákimi Asqar Myrzahmetov balalardy merekemen quttyqtap, Prezıdenttiń atynan 200 balaǵa noýtbýk tabystady. Merekelik shyrshaǵa qatysqan balalarǵa teleekran arqyly Elbasynyń arnaıy quttyqtaýy kórsetilip, Alpamys batyr, Qobylandy batyr jaıly shyǵarmalar men sıqyrly matematıka kitaby, túrli táttiler syıǵa tabystaldy. Sonymen qatar halyqaralyq konkýrstarda júldeli oryndarǵa ıe bolǵan bıshiler men búldirshinder óner kórsetti. Merekelik shara barysynda 2014 jylǵy 2 jeltoqsanda Temirtaý qalasynda ótken Prezıdenttik olımpıadaǵa qatysyp, júldeli II oryndy ıelengen ońtústikqazaqstandyq eki oqýshy (Kentaý qalasyndaǵy «Daryn» mektebiniń oqýshysy Asııa Hýzıahmetova men Shardara qalasyndaǵy №3 «Daryn» mektebiniń oqýshysy Asylhan Nurǵalı) arnaıy marapattaldy. Eki kún buryn Prezıdenttik shyrshaǵa arnaıy aýdan, qalalardan kelgen oqýshylar daryndy balalarǵa arnalǵan №1 mektep-ınternatqa ornalastyrylyp, qalanyń kórikti jerlerine saıahat jasady. 2014 jyldy ońtústikqazaqstandyq oqýshylar tolymdy jetistiktermen qorytyndylap otyr. Halyqaralyq jáne respýblıkalyq olımpıadalar men ǵylymı jobalar baıqaýynda, sport pen óner saıystarynda oblystyń 700 oqýshysy jeńimpaz atandy. 436 mektep bitirýshi «Altyn belgi» ıegeri atansa, bıylǵy respýblıkalyq pán olımpıadasynda І oryndy jáne «Úzdik olımpıadalyq komanda-2014» ataǵyn jeńip aldy. Mektep jáne kolledj oqýshylary arasyndaǵy VІІ jazǵy respýblıkalyq spartakıadada І oryndy ıelenip, oblys mereıin ósirdi.
