Prezıdenttik saılaýǵa kommýnıster óz ókilin mindetti túrde usynatyn bolady - V.Kosarev
ASTANA. QazAqparat - Prezıdenttik saılaýǵa kommýnıster óz ókilin mindetti túrde usynatyn bolady. Bul týraly QR Parlamenti Májilisindegi «Halyqtyq kommýnıster» (QHKP) fraktsııasynyń jetekshisi Vladıslav Kosarev málim etti.
"Búgin partııa bıýrosy sezdiń ótetin kúnin belgileıdi. Sez barysynda prezıdenttikke úmitker kim bolatynyn jáne ony qashan taǵaıyndaıtynymyz talqylanady. Ony osy aptada jınalatyn delegattar sheshedi. Sez kelesi aptada ótýi yqtımal. Árıne, bizden kandıdat bolady. Biraq onyń kim bolatynyn áli anyqtaǵan joqpyz. Bizdiń aramyzda úmitkerler kóp, sondyqtan ishimizde áli irikteý bolatyny anyq", - dedi ol tilshilerdiń saýalyna jaýap qaıyrý kezinde.
"Biz osynaý saıası sharaǵa qatyspasaq, saıası partııa bolmas edik. Eldiń saıası ómirindegi eleýli oqıǵadan tys qalǵymyz kelmeıdi. Sebebi, partııa óz qatarynyń básekege qabilettiligin anyqtap, halyqtyń áleýmettik máselelerin sheshýge atsalysýy tıis. Óıtkeni saılaýda mundaı máseleler óte tıimdi sheshilip jatady. Bizdiń partııa bılikke kelýge talpynatyn partııa. Saılaý - partııamyzdyń baǵdarlamalyq maqsattaryn oryndaýǵa múmkindik beredi. Joǵary orynǵa úmitimiz bar. Bizde birneshe kandıdat bar. Saılaýda kandıdat bolatyny anyq. Qazir úmitkerlerdiń atyn aıta almaımyn. Ázirge 4 úmitker bar", - dep atap ótti ol.
