Prezıdenttik saılaýǵa qatysýǵa ótinish bergen Qanat Esjanov memlekettik tilden emtıhan tapsyra almady
ASTANA. 15 aqpan. QazAqparat /Aıdar Ospanalıev/ - Prezıdenttik saılaýǵa qatysýǵa úmitker retinde OSK-ǵa ótinish bergen Astana qalasynyń turǵyny, ýaqytsha jumyssyz azamat Qanat Esjanov memlekettik tildi erkin meńgermegen.
Búgin atalmysh kandıdattan emtıhan alǵan Prezıdentikke kandıdattardyń memlekettik tildi erkin meńgergendigin anyqtaý jónindegi lıngvıstıkalyq komıssııa ókilderi osyndaı sheshim shyǵardy.
Komıssııa otyrysynan soń Q.Esjanovtyń emtıhan tapsyrý nátıjelerin qorytyndylaǵan lıngvıstıkalyq komıssııa tóraǵasy Myrzataı Joldasbekovtiń sózine qaraǵanda, úmitker úsh kezeńnen turatyn emtıhannyń birinshisinde «Táýelsizdik belesteri» degen taqyrypta shyǵarma jazdy. Úmitker shyǵarmaǵa qosymsha ýaqytty da paıdalandy. «Onyń nátıjesi - jazba jumysynda aýyzeki sóıleý tili basym boldy. Ádebı normamen júıeli oı aıtý jetispeıdi. Ol «u»,«ú», «ý» áripterin shatastyrdy. Sondaı-aq «a» men «á» áripterin shatastyrdy. Jazba jumysynda 20 emile qatesi, 12 dybys belgileri qateleri, 4 stıldik qateler, barlyǵy 36 qate ketti»,-dedi komıssııa tóraǵasy.
Sondaı-aq onyń sózinshe, úmitker emtıhannyń ekinshi kezeńinde Abaıdyń qara sózderin ejiktep, óte qınalyp oqydy. «Budan soń biz oǵan 33-shi, 34-shi jáne 35-shi qara sózder boıynsha suraq qoıdyq. Biraq úmitker oǵan jaýap bere almady. Úshinshi kezeń «Qazaq sporty belesten, beleske» degen taqyrypqa arnaldy. Alaıda úmitker sporttan habary shamaly ekendigin aıtyp, basqa taqyryp surady. Biz úmitkerge daıyndalý úshin 1 saǵat ýaqyt berdik. Q.Esjanov úshinshi kezeńge belgilengen 15 mınýttyń ornyna 6 mınýt sóıledi. Biz suraqqa anyq jaýap ala almadyq, suraq ashylmady. Onyń ústine, úmitker oryssha-qazaqsha sózderdi aralastyryp sóıledi. Sondyqtan lıngvıstıkalyq komıssııa ókilderi «QR Prezıdenttiginen úmitker Q.Esjanov qazaq tilin erkin meńgermegen» - dep sheshti»,- dedi M.Joldasbekov.
