Prezıdenttik saılaýdy ótkizýge qansha qarjy bólinedi

NUR-SULTAN. QazAqparat - QR Qarjy vıtse-mınıstri Berik Sholpanqulov kezekten tys prezıdenttik saılaýǵa qarjy bólý boıynsha Ortalyq saılaý komıssııasynyń ótinishhatyn jarııa etti, dep habarlaıdy QazAqparat tilshisi.

«Saılaýǵa búginde OSK 12 mlrd teńge bólý týraly ótinishhatty engizdi. Qazirgi kezde esepteýler júrgizilýde, ıaǵnı osy baǵalaýdyń negizdiligi tekserilýde. Onyń qorytyndysyn qosymsha habarlaımyz», - dedi B. Sholpanqulov Senatta tilshilerdiń saýalyna jaýap bere otyryp.

Onyń sózine qaraǵanda, atalǵan qarjy somasy azaıýy múmkin.

«Bólinetin qarjy deńgeıi tómendeýi yqtımal, ony esepteýler kezinde naqtylaımyz. Qarjynyń 70 paıyzy saılaý okrýgterinde jumys isteýge tartylatyn adamdardyń eńbekaqysy», - dedi vıtse-mınıstr.

«Eger de barlyq esepteýler usynylsa, biz eki kúnniń ishinde taldaý júrgizip, qortyndysyn jasaýǵa daıynbyz. Ótken jylǵy talqylaý kezinde 2020 jylǵa 8,8 mlrd teńge qarastyrylǵan edi. Alaıda eń tómengi eńbekaqynyń artýyna baılanysty ósim boldy», - dedi Berik Sholpanqulov.