Prezıdenttik saılaýda táýelsiz kandıdat Úkimet basshysyn shań qaptyrdy
ASTANA. QazAqparat - Saılaý ýchaskelerindegi 96,77 paıyz málimetter óńdelgennen keıin Slovakııa prezıdenttik saılaýynda táýelsiz kandıdat Andreı Kıskanyń jeńiske jetkendigi belgili boldy. Bul jaıynda Slovakııa Ortalyq saılaý komıssııasyna silteme jasap sheteldik BAQ habarlaýda.
Sál erterek Slovakııa prezıdenttigine kandıdat bolǵan eldiń Premer-Mınıstri Robert Fıtso óziniń saılaýda jeńilgendigin moıyndaǵan bolatyn.
A.Kısko óziniń saılaýaldy shtabynda baspasóz máslıhatyn ótkizip, ol Slovakııanyń barlyq telearnalarynda tikeleı efır arqyly kórsetildi. «Maǵan daýystary men qýatty prezıdenttik mandat bergen saılaýshylarǵa rahmet. Men barlyq slovaktardyń prezıdenti bolýǵa ýáde berdim, ol ýádemdi oryndaıtyn bolamyn. Men bizdiń saıasatymyzdy jaqsartamyn», - dep málimdeme jasady ol.
Slovakııa OSK aqparatyna qaraǵanda, saılaý ýchaskelerindegi 96,77 paıyz málimetter óńdelgennen keıin táýelsiz kandıdat, tanymal slovakııalyq fılantrop ári kásipker Andreı Kıskanyń saılaýshylardyń 59,45 paıyz daýysyn jınaǵandyǵy belgili boldy. Al eldiń Premer-Mınıstri ári Smer-SD sotsıal-demokratııalyq partııanyń tóraǵasy Robert Fıtso 40,54 paıyz daýys jınady.
Slovakııa OSK prezıdenttik saılaýdyń ekinshi kezeńiniń nátıjelerin búgin kúndiz resmı jarııa etedi dep kútilýde.
