Prezıdenttik saılaý ulttyq mereke formatynda ótti - Saıasattanýshy
ASTANA. QazAqparat - Osy jolǵy kezekten tys prezıdenttik saılaý ulttyq mereke túrinde ótti. Bundaı pikirdi búgin QR Prezıdenti janyndaǵy Strategııalyq zertteýler ınstıtýtynyń dırektory Erlan Qarın aıtty.
«Kóptegen halyqaralyq jáne otandyq sarapshylardyń atap ótýinshe, keshe aıaqtalǵan saılaý naýqany óziniń formaty boıynsha ulttyq merekege uqsas boldy. Bul jolǵy prezıdenttik saılaý óziniń mańyzy men formaty, jalpy ulttyq fony turǵysynda 1991 jylǵy birinshi prezıdenttik saılaýǵa óte jaqyn ekenin ańǵartty. Sol kezde de yntymaqtyń, azamattar belsendiliginiń, qoǵam birliginiń joǵary deńgeıi baıqalǵan edi»,-dedi «E. Qarın «Saılaý 2015: qorytyndylar men baǵalaýlar» atty sarapshylyq forýmda.
Osy oraıda ol 1991 jyldaǵy birinshi prezıdenttik saılaý eldiń jańa ulttyq trıhyn, memlekettiliktiń jańa kezeńin esepteýdiń núktesi bolǵandyǵyn atap ótti.
«Elimiz óziniń damýynyń jańa kezeńine engenin adamdar túsinip otyr. Bizdiń qoǵam jahandyq qaterler men eldiń aldynda turǵan maqsattar turǵysynda aǵymdaǵy sáttiń mańyzdylyǵyn uǵyndy»,-dedi E. Qarın.
Aıta keteıik, sarapshylyq forým jumysyna tanymal saıasattanýshylar, áleýmettanýshylar, saılaý úderisiniń mamandary qatysýda. Olar elektoraldyq naýqannyń qorytyndysyn talqylaýda.
