Prezıdenttik olımpıada júldegerlerine bilim granty beriledi

ASTANA. QazAqparat – Jaratylystaný-matematıka tsıkli pánderi boıynsha Prezıdenttik olımpıadanyń respýblıkalyq kezeńine 192 oqýshy ótti, dep habarlaıdy QazAqparat Oqý-aǵartý mınıstrliginiń baspasóz qyzmetine silteme jasap.

Olımpıadanyń úshinshi kezeńi 29 qarasha-2 jeltoqsan kúnderi akademık E. A. Bóketov atyndaǵy Qaraǵandy ýnıversıtetinde ótedi. Jeńimpazdar Qazaqstan-Brıtan tehnıkalyq ýnıversıteti (9) jáne Q. Jubanov atyndaǵy Aqtóbe óńirlik ýnıversıteti (5) sııaqty JOO-larda oqýǵa grant alady. «Olımpıadanyń birinshi kezeńine 3 myńǵa jýyq oqýshy qatysty. Balalardyń olımpıadaǵa qatysý kórsetkishi ósip keledi. Olar matematıka, bıologııa, hımııa jáne fızıka pánderi boıynsha jarysqa tústi. Baıqaýǵa buryn respýblıkalyq jáne halyqaralyq pándik olımpıadalarǵa qatyspaǵan 11 (12) synyp oqýshylary baq synaıtynyn eske salamyz. Olımpıada jeńimpazdary men júldegerleri QR Oqý-aǵartý mınıstrliginiń I, II jáne III dárejeli dıplomdarymen marapattalady jáne granttardy bólýde basym quqyqqa ıe bolady», - dedi QR Oqý-aǵartý mınıstrligi Orta bilim komıtetiniń tóraǵasy Gúlmıra Kárimova. Mysaly, byltyr mınıstrliktiń bastamasymen Qazaqstannyń 20 joǵary oqý orny osy olımpıada jeńimpazdaryna 50-ge jýyq grant bólgen. Mınıstrlikke qarasty «Daryn» ortalyǵynyń ókilderi joǵary oqý oryndaryn bilim granttaryn bólý bastamasyn qoldaýǵa shaqyrdy. Osylaısha, bıyl Qazaqstan-Brıtan tehnıkalyq ýnıversıteti jeńimpazdarǵa 9 grant, Q. Jubanov atyndaǵy Aqtóbe óńirlik ýnıversıteti 5 grant bólip otyr. Olımpıadanyń jabylý jáne jeńimpazdar men júldegerlerdi marapattaý rásimi 2 jeltoqsan kúni ótedi.