Prezıdenttik olımpıada júldegerleri bilim granttary men ataýly stıpendııalarǵa ıe boldy

ASTANA. QazAqparat – 54 oqýshy jaratylystaný-matematıka tsıkli pánderi boıynsha Prezıdenttik olımpıadanyń jeńimpazy atandy, dep habarlaıdy QazAqparat Oqý-aǵartý mınıstrliginiń baspasóz qyzmetine silteme jasap.

Eń joǵary upaı jınaǵan qatysýshylar elimizdiń aldyńǵy qatarly ýnıversıtetterine 35 grant pen 12 ataýly stıpendııany jeńip aldy.

«Prezıdenttik olımpıadanyń arqasynda oqýshylarymyz óz áleýetin ashyp, bilim granttary túrindegi qomaqty qoldaýǵa ıe bolyp jatyr. Balalardyń olımpıadaǵa qatysý kórsetkishi ósip keledi. Olar matematıka, bıologııa, hımııa jáne fızıka pánderi boıynsha bilimderin sarapqa saldy. Baıqaýǵa buryn respýblıkalyq jáne halyqaralyq pándik olımpıadalarǵa qatyspaǵan 11 (12) synyp oqýshylary qatysa alatynyn eske sala keteıin. Byltyr mınıstrliktiń bastamasymen Qazaqstannyń 20 JOO osy olımpıadanyń jeńimpazdaryna 50-ge jýyq grant bóldi. Al, bıyl «Daryn» ókilderi joǵary oqý oryndaryn grant bólýge shaqyrǵan bolatyn. Nátıjesinde 6 ýnıversıtet jeńimpazdarymyzǵa 35 grant pen 12 ataýly stıpendııa bóldi. Daryndy balalarymyzǵa qoldaý kórsetken joǵary oqý oryndarynyń basshylaryna alǵysymyz sheksiz», - dedi Oqý-aǵartý mınıstrligi Orta bilim komıtetiniń tóraǵasy Gúlmıra Kárimova.

Sondaı-aq, Olımpıadanyń qorytyndysy boıynsha mınıstrliktiń І dárejeli dıplomymen 9 qatysýshy, ІІ dárejeli dıplomymen 18 qatysýshy jáne ІІІ dárejeli dıplomymen 27 qatysýshy marapattaldy.