Prezıdenttik Mádenıet ortalyǵynda kórnekti jazýshysy Zeıin Shashkınniń 100 jyldyq mereıtoıyna arnalǵan kesh ótedi
ASTANA. 7 aqpan. QazAqparat - 10 aqpanda Astanadaǵy Prezıdenttik Mádenıet ortalyǵynda Qazaqstan Respýblıkasynyń kórnekti jazýshysy Zeıin Shashkınniń 100 jyldyq mereıtoıyna arnalǵan eske alý keshi ótedi.
Prezıdenttik Mádenıet ortalyǵy taratqan málimetterge qaraǵanda, kesh 10 aqpan kúni saǵat 19.00-de bastalady.
Zeıin Júnisbekuly 1912 jyly 31 jeltoqsanda Pavlodar oblysy Baıanaýyl ólkesinde dúnıege kelgen. 1930 jyly orta mektepti bitirgennen keıin Máskeýdiń tarıh, fılosofııa jáne ádebıet ınstıtýtyna oqýǵa túsedi. Ádebıettegi jolyn óleń jazýmen bastaǵan ol keıinnen ádebıetti zertteý isine bet burady. Keıinirek ádebıet synshysy bolady.
1934 jyly Abaıdyń aqyndyq sheberligi jaıynda eńbegi jaryq kórdi. 1940 jyly E. Ismaılovpen birigip, joǵarǵy oqý oryndaryna arnap, «Ádebıet teorııasy» oqýlyǵyn shyǵarady. Budan keıin proza janryna oıysyp, «Tań atty» (1956), «Toqash Bokın», (1958) atty tarıhı taqyryptardaǵy romandaryn, «Temirqazyq» (1960), «Ómir tynysy» (1964) povesterin jazdy. Onyń «Temirtaý» romany Respýblıkamyzdaǵy tuńǵysh metallýrgııa salasy men osy sala ókilderiniń beınesin sýrettese, «Doktor Darhanov» (1962) atty romany zııaly qaýym ókilderiniń qalyptasýyn baıandady. «Senim» romany ǵylymı-tehnıkalyq progress jaǵdaıynda sharýashylyqty neǵurlym tıimdi, paıdaly etip uıymdastyrý máselesin kóterdi. 1962 jyly Toqash Bokın týraly «Dala shapaǵaty» (orys tilinde «Stepnoe zarevo»), 1965 jyly «Aqyn júregi» pesalaryn jarııalady. Alty tomdyq shyǵarmalar jınaǵy 1972 - 79 jyldary aralyǵynda jaryq kórdi. Zeıin Shashkın shyǵarmalary Keńester Odaǵy halyqtarynyń birqatar tilderine aýdarylǵan.
Іs-sharaǵa QR Mádenıet jáne aqparat mınıstrliginiń ókilderi, Parlament depýtattary, Astana qalasynyń turǵyndary men qonaqtary qatysady dep kútilýde.
