Prezıdenttik mádenıet ortalyǵynda Qazaq ulttyq óner akademııasynyń akademıgi Marat Nısýpovtyń jeke kórmesi ashylady
ASTANA. 28 qazan. QazAqparat - 1- qarashada QR Prezıdenttik mádenıet ortalyǵynyń kórme zalynda belgili sýretshi, KSRO Sýretshiler odaǵy men Qazaqstan Sýretshiler odaǵynyń múshesi, Qazaq ulttyq óner akademııasynyń akademıgi Marat Álimqululy Nısýpovtyń jeke kórmesi ashylady jáne «Elim meniń, jerim meniń» atty kitabynyń tusaýkeseri ótedi.
Marat Álimqululy Nısýpov 1957 jyly, Taldyqorǵan oblysy Kırov aýdany Kóksý stansasynda dúnıege kelgen. 1978-1982 jyldary Qazaqtyń Abaı atyndaǵy pedagogıkalyq ınstıtýtynyń kórkem-sýret grafıka fakýltetin bitiredi. Stýdent kezinde-aq respýblıkalyq, búkilodaqtyq kórmelerge qatysyp júldeger atanǵan M. Nısýpov ınstıtýtty bitirgen jyly sol oqý orynynyń kórkem-sýret kafedrasyndaǵy oqytýshylyq qyzmetin bastady. 1982 jyly KSRO Jas sýretshiler odaǵyna qabyldanady.
M. Nısýpovtyń maıly boıaýmen salynǵan "Qobyz nege jylaıdy?", "Ǵasyrlar úni", "Kombaınshylar" taǵy da basqa týyndylary kóptegen úlken kórmelerde júldelerge ıe boldy. 1990 jyly KSRO Sýretshiler odaǵyna qabyldanǵan talantty sýretshi Dinmuhamed Qonaev, Nursultan Nazarbaev, Asanáli Áshimov, Bıbigúl Tólegenova syndy kóptegen óner adamdary men memleket qaıratkerleriniń portretterin saldy. M. Nısýpov talantynyń taǵy bir qyry ol - músinshilik. Shý qalasyndaǵy Turar Rysqulov eskertkishiniń músinin Qazaqstan Sýretshiler odaǵynyń múshesi Tileýberdi Bınashevpen birlese otyryp somdaǵan. M. Nısýpov týyndylary elimizdegi jáne kóptegen shet el kollektsıonerleriniń jınaqtarynda bar.
Sýretshi shyǵarmashylyǵy belgili bir janrmen ǵana shektelip qalmaıdy. Onyń qylqalamy portretke de, natıýrmortqa da, peızajǵa da, etıýdqa da asa beıim. Ár shyǵarmasynan onyń janynyń kirshiksiz tazalyǵy, ishki dúnıesiniń máni men mazmuny aıqyn kórinip turady.
M. Nısýpovtyń eń alǵashqy jumystarynyń ózi qazaq halqynyńulttyq minez-qulqynan habar berip tur. Marat Álimqululynyń keıingi týyndylary qazaqtyń ulttyq boıaýymen salynǵan. Onyń ishinde "Kókpar", "Báıge", "Ata tolǵaýy", "Apam meniki", "Aqjúnis" sekildi týyndylary salt-dástúr naqyshynda beınelengen. Kórmege sýretshiniń 40-tan astam týyndysy qoıylady.
