Prezıdenttik mádenıet ortalyǵynda Elbasynyń bıylǵy Joldaýyn túsindirýge arnalǵan respýblıkalyq semınar-keńes ótti

dep habarlaıdy QazAqparat.

Sharaǵa Prezıdent Ákimshiligi men Premer-Mınıstr Keńsesiniń basshylyǵy, mınıstrler men vıtse-mınıstrler, ortalyq jáne jergilikti atqarýshy organ qyzmetkerleri, joǵary oqý oryndarynyń rektorlary, respýblıkalyq BAQ basshylary jáne «Nur Otan» partııasy men ózge de birqatar qoǵamdyq uıym ókilderi qatysty.

Jıynda Joldaý taqyryptary boıynsha túsindirý is-sharalaryn uıymdastyrýdyń negizgi ádisteri talqylanyp, ártúrli áleýmettik toptarmen jumys jónindegi usynystar ázirlendi. Aqparattyq jumystyń, sonyń ishinde respýblıkalyq aqparattyq-nasıhattyq toptarynyń jumys júrgizý ádisteri aıqyndaldy. Naqtyraq aıtqanda, aqparattyq-nasıhat jumystary barysynda negizinen óndiristik kásiporyndar men aýyldyq aımaqtarǵa kóńil bólý usynyldy.

Sonymen qatar, Joldaýda belgilengen - ekonomıka, ındýstrııalandyrý, bilim berý, áleýmettik qorǵaý sııaqty ózge de birqatar salalar boıynsha aldyǵa qoıylǵan mindetterdi júzege asyrý jóninde túsiniktemeler berildi. Semınarda Prezıdent Ákimshiligi basshysynyń orynbasary Máýlen Áshimbaev pen birqatar mınıstrler men saıası partııa jetekshileri arnaıy baıandama jasady.

Sondaı-aq Syrtqy ister, Densaýlyq saqtaý, Týrızm jáne sport mınıstrlikteriniń qurylymdyq bólimsheleriniń basshylary Joldaýdy iske asyrý jónindegi sharalar týraly naqty aqparattar taratty. Jıyn barysynda oǵan qatysýshylarǵa jergilikti jerlerde jumystar júrgizý úshin aqparattyq-ádistemelik materıaldar tabys etildi. Endi Úkimet músheleri jetekshilik etetin barlyq úgit-nasıhat toptary 22 aqpan men 5 naýryz aralyǵynda arnaıy saparǵa shyǵady.

Al jergilikti atqarýshy organdarǵa kórneki úgit-nasıhat quraldaryn ázirleý kezinde biryńǵaı standartardy ustaný usynyldy.