Prezıdenttik mádenıet ortalyǵynda «Armysyń, áz-Naýryz!» merekesi ótti
ASTANA. Naýryzdyń 23-i. QazAqparat /Marlan Jıembaı/ - Naýryzdyń 21-i jáne 22-si kúnderi Astanadaǵy Prezıdenttik mádenıet ortalyǵynda «Armysyń, áz-Naýryz!» merekesi ótti. Onyń alǵashqy kúni kórme zalynda ortalyqta zergerlerdiń qolymen jasalǵan kádesyı ónimderi kórme-jármeńke ashyldy. Kórme-jármeńkeniń ashylýynda sóz alǵan QR Prezıdenttik mádenıet ortalyǵynyń dırektory Myrzataı Joldasbekov, senator Ómirbek Baıgeldi, QR Mádenıet mınıstrligi Mádenıet komıtetiniń tóraǵasy Іlııas Qozybaev jınalǵandardy Ulystyń uly kúnimen quttyqtady.
Ortalyqtyń muajaıynda saqtalǵan sonaý saq dáýirindegi zergerlik buıymdar Berel qorǵanynan tabylǵan. Endi osy jádigerliktiń altynmen aptalǵan kóshirmelerin ortalyq zergeri, Qazaqstannyń eńbek sińirgen qaıratkeri Berik Álibaı bastaǵan ustalar kádesyı retinde qoldan soǵyp, jurtshylyqqa usynyp otyr. Sonymen birge osy buıymdardyń arnaıy katalog-kitaby da jasalǵan. Merekege jınalǵandar sondaı-aq Qazaqstan Sýretshiler odaǵynyń múshesi Nurjan Qarymsaqovtyń maıly boıaýmen salynǵan «Samuryq», «Saq sarbazdarynyń urysy» atty kórkem týyndylaryn da tamashalap kórdi.
Budan keıin kontsert zalynda Túrik Respýblıkasynyń óner qaıratkeri, Gınness rekordtar kitabyna engen túriktiń saz aspabynda túrik halyq maqamdaryn sheber oryndaıtyn Ferhat Dýrmýshtyń kontsertin tamashalady. Qyrǵyz qomyzshysy Ǵalııa Turysbekqyzynyń óneri de kórermenderdi beıjaı qaldyrmady.
Budan ári Ortalyqtyń ulttyq dástúrler teatrynyń ártisteri «Armysyń, áz-Naýryz!» teatrlandyrylǵan qoıylymyn usyndy. Kórermender Aldar-kóse, Qojanasyr, Tazsha bala, Shyǵaıbaı men onyń báıbishesi, Bizbıke sııaqty naýryzdyń basty keıipkerlerimentanysyp, dástúrli Naýryz ázil-ospaǵyna, jastardyń ónerine rızashylyqpen qol soqty. Kesh sońynda sahna sheberleri men búkil kórermenderdiń belsene qatysýymen qazaqtyń «Qara jorǵa» bıi oryndaldy.
