Prezıdenttik qoldaý: Jambylda tabysynan aıyrylǵan 268 myń adam 42 500 teńgeden aldy
TARAZ. QazAqparat – Memleket basshysynyń tapsyrmasy boıynsha Jambyl oblysynda 77 130 adamǵa quny 5567 teńgeni quraıtyn azyq-túlik jıyntyǵy berildi, dep habarlaıdy QazAqparat.
Jalpy óńirde bul baǵytqa 429 mıllıon teńge jumsalǵan. Ol týraly óńirlik kommýnıkatsııalar qyzmeti alańynda ótken brıfıngte oblys ákiminiń orynbasary Erjan Jylqybaev baıandady.
«Memleket basshysy óziniń úndeýinde, memlekettik komıssııa otyrystarynda halyqtyń áleýmettik áleýetine basty nazar aýdaryp keledi. Osyǵan oraı, oblys aýmaǵynda turǵyndardy áleýmettik qoldaý boıynsha keshendi kómek kórsetilýde. Atap aıtqanda, tótenshe jaǵdaıǵa baılanysty tabysynan aıyrylǵan tulǵalarǵa taǵaıyndalatyn 42 500 teńge barlyǵy 268 882 azamatqa tólendi. Tek osy baǵytta 11,4 mlrd teńge jumsalyp otyr»,-dedi ol.
Spıker Prezıdent tapsyrmasyna sáıkes oblystaǵy 77 130 adamǵa quny 5567 teńgeni quraıtyn 429 mln teńgeniń azyq-túlik jıyntyǵy tólengenine toqtalyp ótti.
Sonymen qatar, oblystyq ekonomıkalyq tergeý departamenti tarapynan tárkilengen, quny 546,5 mln teńgeni quraıtyn 530 myń dana kıim-keshek kommýnaldyq menshikke alynyp, muqtaj jáne áleýmettik jaǵdaıy tómen otbasylarǵa taratylmaq.
