Prezıdenttik qoldaý: Jambyl oblysynda 119 myń turǵynǵa kommýnaldyq ótemaqy berý kózdelip otyr
«Búgingi tańda halyq úshin mańyzdy aqparattyń biri - Tótenshe jaǵdaı kezeńinde kommýnaldyq qyzmetterdi jetkizýshilerdiń shyǵyndaryn óteý jaıynda. Tutynýshylardyń abonenttik esep shotyna aı saıyn (2 aıǵa) tikeleı 15 myń teńge aýdarylyp, kommýnaldyq qyzmet aqysy óteledi. Jalpy oblys boıynsha osy baǵytta 119 myń turǵyndy qamtýdy josparlap otyrmyz. Bul boıynsha CALL ortalyq quryldy», - deıdi oblys ákiminiń orynbasary.
Onyń aıtýynsha, kommýnaldyq qyzmetterdi óteý 7 sanattaǵy azamattarǵa berilmek. Olar: 1, 2, 3 toptaǵy múgedekter, múgedek bala tárbıeleýshi otbasylar, kópbalaly otbasylar, UOS múgedekteri men qatysýshylary jáne olarǵa teńestirilgen azamattar, memlekettik nemese qoǵamdyq mindetterin, áskerı qyzmetin oryndaý kezinde, adamdy qutqarý kezinde, quqyq tártibin qorǵaý kezinde qaza tapqan adamdardyń otbasy, eń tómen jáne az zeınetaqy alatyn zeınetkerler, ataýly áleýmettik kómek alatyn azamattar, onyń ishinde jalǵyzbasty zeınetkerler.
Sondaı-aq, budan ózge, oblystyq Nur Otan partııasy fılıalymen birlese, «BizBirgemiz» qory qarajatynan Taraz qalasy boıynsha halyqtyń áleýmettik osal toptaryna kómek berý júrgizildi.
«Azamattar tizimi 7 sanat boıynsha jasaqtalyp, búgingi kúnge 16 768 azamattyń esep shotyna 50 myń teńgeden aýdaryldy. Barlyǵy 838 mln teńge kómek jasaldy. Sonymen qatar, Nur Otan partııasynyń aımaqtaǵy belsendi músheleri, jeke kásipkerlerdiń kómegimen 80 mln teńge kóleminde qarjy jınalyp, 3 myń otbasy alǵashqy kezektegi qajettiliktegi azyq-túlik sebetimen qamtylǵan», - deıdi E.Jylqybaev.
