Prezıdenttik qoldaý: Shaǵyn bızneske memlekettik kepildik nesıe mólsheri 1 mlrd teńgege deıin ulǵaıdy

NUR-SULTAN. QazAqparat – Memleket tarapynan kepildik beriletin nesıe mólsheri 360 mln teńgeden 1 mlrd teńgege deıin ulǵaıtyldy. Bul týraly QR Ulttyq ekonomıka mınıstrliginiń kásipkerlikti damytý departamentiniń dırektory Shyńǵys Ahmetov málim etti, dep habarlaıdy QazAqparat tilshisi.

«Bıznestiń jol kartasy – 2025» baǵdarlamasy sheńberinde sońǵy qaryz alýshy úshin nesıe quny banktiń syıaqy mólsherlemesin sýbsıdııalaýmen eseptegende 6 paıyzdy quraıdy. Bir kásipkerdi nesıelik qoldaý mólsheri 7 mlrd teńgege ulǵaıdy. Buryn 2,5 mlrd teńge bolatyn. Aınalym qarajatyn qarjylaı tolyqtyrý aıasy da aıtarlyqtaı keńeıtildi. Qazir bul shaǵyn jáne orta bıznes úshin eń mańyzdy qarajat bolyp sanalady. Baǵdarlama sheńberinde aınalym qarajaty 60 mln teńgeden 500 mln teńgege deıin ulǵaıyp otyr. Bul rette saýda qyzmeti sýbektileriniń aınalym qarajatyn tolyqtyrý – 100 mln teńgege deıin bolady», - dedi Shyńǵys Ahmetov OKQ-da onlaın rejımde ótken baspasóz máslıhatynda.

Departament dırektory sonymen qatar kásipker nesıe alý kezinde bankke júgingende onyń kepili jetkiliksiz bolǵan jaǵdaı da kezdesetinin jetkizdi.

«Bul óte úlken másele. Osy problemany sheshý maqsatynda memleket tarapynan kepildendirý beriletin nesıeniń mólsheri 360 mln teńgeden 1 mlrd teńgege deıin ulǵaıyp otyr. Osyndaı nesıeniń memleket tarapynan beriletin kepildendirý mólsheri 50 paıyzdy quraıdy. Al 360 mln teńgege deıin beriletin nesıe boıynsha memlekettik kepildendirý 85 paıyzdy qurap otyr», - dedi ol.

Eske sala ketsek buǵan deıin Shyńǵys Ahmetov qazirgi kezeńde shaǵyn jáne orta bıznesti memlekettik qoldaýdyń qandaı tetikteri bar ekenin aıtyp bergen bolatyn.