Prezıdenttik qoldaý: Nur-Sultanda 2 myńǵa jýyq dáriger jalaqysyna ústemeaqy aldy
NUR-SULTAN. QazAqparat - Nur-Sultanda 2 myńǵa jýyq medıtsına qyzmetkeri jalaqysyna ústemeaqy aldy, dep habarlaıdy QazAqparat Nur-Sultan qalasy ákimdiginiń resmı saıtyna silteme jasap.
Basqarma taratqan aqparatqa qaraǵanda, tólemniń jalpy somasy 646 mln.teńgeni qurady.
Qalalyq qoǵamdyq densaýlyqty saqtaý basqarmasynyń basshysy Sáýle Qısyqovanyń aıtýynsha, Nur-Sultanda 1893 medıtsına qyzmetkeri eńbekaqylaryna ústemeaqy aldy. Tólemniń jalpy somasy 646 mln.teńgeni qurady jáne ol Mindetti áleýmettik medıtsınalyq saqtandyrý qorynan bólindi.
«Ústemeaqy jumys istegen ýaqytyna sáıkes esepteledi. Biz 10 sáýirde naýryz aıynyń jumys saǵattary boıynsha tólem jasadyq. Birinshi topta – 400 medıtsına qyzmetkeri, ekinshi topta – 950 dáriger, úshinshi top boıynsha – 543 adam aldy», – dep túsindirdi basqarma basshysy.
Eske sala keteıik, QR Prezıdenti janyndaǵy tótenshe jaǵdaıdy qamtamasyz etý jónindegi Memlekettik komıssııa Memleket basshysynyń tapsyrmasyn oryndaý aıasynda epıdemııaǵa qarsy sharalarǵa qatysqan medıtsınalyq qyzmetkerlerdiń jalaqysyna aı saıyn ústemeaqy taǵaıyndaý týraly sheshimdi bekitti.
Memleket basshysynyń tapsyrmasyn oryndaý sheńberinde Nur-Sultan qalasynda epıdemııaǵa qarsy sharalarǵa qatysyp jatqan medıtsına qyzmetkerlerine qarjy bólýmen aınalysatyn arnaıy komıssııa quryldy.
«Qaýiptiligi asa joǵary jumystaǵy qyzmetkerler úshin ústemeaqy kólemi 20 ETJM (850 myń teńgege deıin), qaýiptiligi joǵary sanattaǵylarǵa 10 ETJM (425 myń teńge), al qaýiptiligi ortasha sanattaǵy medıtsına qyzmetkerlerine 5 ETJM (212 myń teńge) qurady», – dedi «Senim» densaýlyq saqtaý júıesi qyzmetkerleriniń salalyq kəsipodaǵynyń tóraǵasy Rýslan Satypaldıev.
