Prezıdenttik qoldaý: Qostanaılyq polıtseıler az qamtylǵan otbasylarǵa azyq-túlik sebetin alyp berdi
2020 jyldyń 17 sáýirinen bastap Qostanaı oblysynyń aýmaǵynda karantın rejımi engizildi. Osy rette oblystyq JQAJ qyzmetkerleri qıyn jaǵdaıǵa tap bolǵan kóp balaly otbasylarǵa qol ushyn sozdy. Tártip saqshylary azyq-túlik jáne dári-dármekter satyp alyp berdi.
Oblys ortalyǵynyń turǵyny Álııa shaǵyn ǵana úıde bir ózi bes balany tárbıelep otyr. Eń kishi balasy – 5, úlkeni – 12 jasta. Polıtseıler negizgi azyq-túlik sanatyna kiretin taýarlardan tys, jemis-jıdek, kókónis, jarma jáne tátti taǵamdar apardy. Dárihanadan jótelge qarsy sıroptar, vıtamınder jáne balalardyń ystyǵyn túsiretin dáriler aldy.
«Biz qazir naqty kómekke muqtaj otbasylarǵa kómek kórsetemiz. Olarǵa osy sátte qıyn ekenin bilemiz. Bir áıel bes balany tárbıelep jatqanyn bilgennen keıin, áriptesterim kómek kórsetýge qýana ún qosty. Departament basshylyǵynyń bastamasymen qaza tapqan qyzmetkerlerdiń jesirlerine, jalǵyz basty analarǵa, kóp balaly otbasylarǵa, sondaı-aq balalar úıiniń tárbıelenýshilerine únemi kómek kórsetip, qaıyrymdylyq aktsııalarǵa qatysamyz. Bul ıgi is jalǵasa beredi», - dep atap ótti JQAJ komandıri, polıtsııa maıory Jánibek Muhamedjanov.
Tıisinshe, qıyn sátte kómek qolyn sozǵan otbasy tártip saqshylaryna alǵys aıtty.
«Polıtsııa qyzmetkerlerine rahmet. Biz úshin bul úlken qoldaý. Bes jasar ulym Tımýr polıtseı bolýdy armandaıdy. Qoǵam tynyshtyǵyn túzetip qana qoımaı, áleýmettik sharalarǵa qatysyp júretin polıtseılerdiń bary qýantady», - deıdi bes balanyń anasy.
Tártip saqshylary mundaı aktsııany aldaǵy ýaqytta da ótkizýdi josparlap otyr.
