Prezıdenttik qoldaý: Batys Qazaqstanda kommýnaldyq qyzmetter baǵasy tómendedi

ORAL. QazAqparat – Batys Qazaqstan oblysynda kommýnaldyq qyzmetter baǵasy tómendedi. Bul týraly QR Tabıǵı monopolııalardy retteý komıteti BQO boıynsha departamenti basshysynyń mindetin atqarýshy Oralbek Qulmurzın málim etti, dep habarlaıdy QazAqparat tilshisi.

Memleket basshysy Qasym-Jomart Toqaevtyń tapsyrmasyna sáıkes tótenshe jaǵdaı kezinde 1 sáýirden bastap óńirde kommýnaldyq qyzmetter baǵasy arzandady.

Atap aıtqanda, Oral qalasy turǵyndaryna «Batys sý arnasy» JShS-nyń sýmen qamtý qyzmeti qosymsha qun salyǵyn qosa eseptegende 1 m³ úshin 46,28 teńgeden 44,89 teńgege deıin nemese 3 paıyzǵa tarıf tómendetildi.

Sol sekildi qala turǵyndaryna «Jaıyqjylýqýat» AQ-nyń jylýmen qamtý qyzmeti qosymsha qun salyǵyn qosa eseptegende 1 Gkal úshin 4 122,1 teńgeden 3 916,0 teńgege deıin nemese 5 paıyzǵa azaıtyldy.

Oblys turǵyndaryna «Batys Energoresýrsy» JShS-nyń elektrmen qamtý qyzmeti qosymsha qun salyǵyn qosa eseptegende 1 kVt/saǵat úshin 12,64 teńgeden 12,27 teńgege deıin nemese 3 paıyzǵa tústi.

«Aqsaıjylýqýat» MKK da Aqsaı qalasynyń turǵyndary úshin jeńildik jasady. Dálirek aıtqanda, jylýmen qamtý qyzmetine QQS-men eseptegende 1 Gkal úshin 4 016,68 teńgeden 3 735,5 teńgege deıin nemese 7 paıyzǵa, sýmen qamtý qyzmetine QQS-men eseptegende 1 m³ úshin 51,25 teńgeden 47,67 teńgege deıin nemese 7 paıyzǵa jáne sý burý qyzmetine QQS-men eseptegende 1 m³ úshin 51,33 teńgeden 47,75 teńgege deıin nemese 7 paıyzǵa tarıf tómendetildi.

«Gaz baǵasy QR Tabıǵı monopolııalardy retteý komıtetimen retteletin bolady. Óńirdegi monopolıst kásiporyndarǵa tótenshe jaǵdaı kezinde bereshegi bar turǵyndarǵa kommýnaldyq qyzmet kórsetýdi toqtatpaýdy ótinip, usynym hat joldadyq», dedi O. Qulmurzın.