Prezıdenttik qoldaý: Atyraýda dárigerler ústemeaqysy úshin 288,7 mln teńge bólingen
ATYRAÝ. QazAqparat –Atyraý oblysynyń ákimi Mahambet Dosmuhambetov koronavırýs ınfektsııasyna qarsy kúreste aldyńǵy sapta júrgen medıtsına qyzmetkerlerimen onlaın suhbat ótkizip, olarǵa alǵys bildirdi, dep habarlaıdy QazAqparat.
Onlaın baılanysqa koronavırýs ınfektsııasyn juqtyrǵandarmen tikeleı jumys jasap jatqan oblystyq jedel járdem stantsııasy men ınfektsııalyq bólimshe ornalasqan №2 oblystyq aýrýhananyń dárigerleri qosyldy.
«Qazir sizder shyn máninde myltyqsyz maıdandasyzdar. Óıtkeni, kúndelikti qaýip-qaterge qaramastan qajyrly jumys istep, búgingi kúnniń qaharmandaryna aınaldyńyzdar. Qazaqstan medıtsınasynyń erlikke toly jańa tarıhyn jazyp jatyrsyzdar. Halqymyz ózderińizge úmit artyp, amandyqtaryńyzdy tilep otyr. Bizdiń de basty mindetimiz – eń aldymen, sizderdi qoldaý», - dedi oblys ákimi Mahambet Dosmuhambetov.
Oblysta medıtsına salasy mamandaryna ústemeaqy tóleý úshin 288,7 mıllıon teńge bólingen. Naýryz aıynda onyń 44,5 mıllıon teńgesi 373 qyzmetkerdiń qolyna tıdi. Budan tys, koronavırýspen kúresip jatqan dárigerlerdi yntalandyrýdyń qosymsha joldary qarastyryldy. Atap aıtqanda, demeýshiler tartyla otyryp, 634 mamanǵa kótermeleý qarjysy tólendi. Al, 164 dáriger jáne jedel járdem stantsııasy qyzmetkerleri qonaqúılerge ornalastyryldy.
Tikeleı suhbat barysynda №2 oblystyq aýrýhananyń dárigerleri naýqastardy emdeý joldary týraly baıandady. Máselen, ınfektsııalyq statsıonarǵa 27 naýryzdan búginge deıin 123 naýqas qabyldanǵan. Onyń 59-y tolyq nátıjeli emin alyp, aýrýhanadan shyǵaryldy. Al, jedel járdem stantsııasy mamandarynyń aıtýynsha, COVID-19 ınfektsııasyn juqtyrǵandarmen jaqyn jáne yqtımal baılanysta bolǵan azamattardy tasymaldaýǵa 3 arnaıy brıgada jasaqtalǵan. Sáýirde qosymsha 2 arnaıy brıgada taǵy qosylǵan. Sonymen qatar, qorda bir ret qoldanylatyn maska, arnaıy qorǵanys kostıýmderi, qorǵanys kózildirigi jetkilikti. Densaýlyq saqtaý basqarmasy, demeýshiler, eriktiler qorǵanys kıimderimen únemi qamtamasyz etilýde.
«Densaýlyq saqtaý salasy únemi basty nazarymyzda bolady. Oblystaǵy árbir medıtsına qyzmetkeriniń orny biz úshin erekshe. Bul indetti birge jeńetinimizge senemin. Otbasylaryńyzben tez qaýyshýlaryńyzdy tileımin» - dep oblys ákimi Mahambet Dosmuhambetov medıtsına qyzmetkerlerine alǵysyn bildirdi.
