Prezıdenttik qoldaý: 51 myńnan astam aqmolalyq kommýnaldyq qyzmetter úshin ótemaqy alady
KÓKShETAÝ. QazAqparat – Aqmola oblysynda 51 myńnan astam adam kommýnaldyq qyzmetter úshin 15 myń teńge ótemaqy alady, dep habarlaıdy QazAqparat tilshisi oblystyq ishki saıasat basqarmasyna silteme jasap.
Vedomstvonyń málimetinshe, mundaı kómekke azamattardyń 7 canaty qol jetkize alady. Olar 1, 2, 3 toptaǵy múgedekter, múgedek bala tárbıelep otyrǵan otbasylar, kópbalaly otbasylar, memlekettik mindetin oryndaý kezinde kóz jumǵandar, soǵys ardagerleri men múgedekteri, jáne olarǵa teńestirilgen tulǵalar, eń tómeńgi zeınetaqy alatyn zeınetkerler, ataýly áleýmettik kómek alatyn azamattar, onyń ishinde jalǵyz basty ardagerler.
Osy krıterılerge sáıkes, oblystyń 51 257 turǵyny kommýnaldyq qyzmetter úshin 15 myń teńge ótemaqy alady. Kommýnaldyq qyzmetter úshin ótemaqy qarajaty birden tutynýshylardyń jeke shotyna aýdarylady.
«Kommýnaldyq qyzmetter boıynsha shyǵyndy óteý úshin tutynýshylar aqparattyq júıe arqyly ótinish beredi, eger ol bolmasa jergilikti atqarýshy organdardaǵy call-ortalyq arqyly jeke sáıkestendirý nómiri, áleýmettik statýsy jáne jeke shoty málimetin usynýy arqyly júzege asyrylady. Qazirgi kezde, ótinishterdi qabyldaý máselesi sheshilýde», - dep atap ótti oblystyq jumyspen qamtýdy jáne áleýmettik baǵarlamalardy úılestirý basqarmasyndaǵylar.
Aıta keteıik, QR Indýstrııa jáne ınfraqurylymdyq damý mınıstrligi tótenshe jaǵdaı kezinde karantın rejımi engizilgen aýmaqtardaǵy eldi mekenderge kommýnaldyq qyzmetterdi jetkizip berýshilerdiń shyǵyn óteýdiń erejesin bekitken bolatyn.
