Prezıdenttik kadrlyq rezerv jastar úshin jańa beles boldy - joba jeńimpazy Dáýlet Káribek
«Eń aldymen, Prezıdenttik kadrlyq rezerv arqyly Memleket basshysy Qasym-Jomart Toqaevtyń saılaýaldy baǵdarlamasynda aıtqan tarmaqtarynyń oryndalýyn kórip otyrmyz. Bul bastama 2019 jyldyń ortasyna taman aıtylsa da, jyl sońyna jetpeı, rezervtiń iske qosylýy appparattyń tıimdi jumys isteýin kórsetedi. Bul jerde rezervke ótken 300 adamnyń taǵaıyndalýy emes, basty maqsat - memleketshil, otanshyl jastardyń ótiline qaramaı, memlekettik ıdeıany júzege asyrýyna, memlekettik qyzmet isterine aralasýyna múmkindik berý», - dedi D. Káribek QazAqparat tilshisine bergen suhbatynda.
Onyń aıtýynsha, Prezıdenttik kadrlyq rezerv der kezinde jasaqtaldy. Sebebi, 2050 jyly Qazaqstanda ómir súretin de, ony úzdik otyz eldiń qataryna engizý úshin jumys isteıtin de - qazirgi jastar bolmaq.
«Sondyqtan, jastardy memlekettik qyzmetke tartýdyń osyndaı mehanızmderi jastar tarapynan jyly qabyldandy. Jastar da jobaǵa qatysýshy retinde ǵana emes, ózderiniń baǵyndyrar belesi retinde, bilimi men tájirıbesiniń, biliktiliginiń synǵa túsetin kezeńi dep qarady. Prezıdenttiń kadrlyq rezervine engen otanshyl, bilimdi, kreatıvti oılaıtyn jastar memleketimizdiń basty Strategııasy – «Qazaqstan-2050» júzege asyrýǵa, otyz eldiń qataryna engizýge baryn salýy tıis. Sebebi 30 eldiń qataryna ený – bilim sapasynyń, medıtsına sapasynyń, mıllıondaǵan adamdardyń ómir súrý sapasynyń jaqsarýyn bildiredi», - dedi «Jas Otan» ókili.
Spıker Prezıdenttik kadr rezervine irikteý kezeńderi týraly aıtyp berdi.
«Bastapqy kezeńderi qıyn boldy, verbaldy test ońaı bolǵanymen, matematıkalyq testti kúnde jasap júrmegendikten qıynǵa soqty. Kelesi kezeńderde daıyndyqty kúsheıtip, ózimizdi jan-jaqty kórsetýge tyrystyq. Bul rezervti jastarǵa arnalǵan jańa bir beles dep aıtýǵa bolady. Keı synaqtar oıyn túrinde ótti, aqparattyq joba qorǵadyq. Árbir tapsyrǵan testimizdiń beınekameraǵa jazylýy da irikteýdiń ashyqtyǵyn, ádildigin kórsetti. Osylaısha, úmitkerler árbir kezeńde túrli múmkindikterin kórsete aldy», - dedi D. Káribek.
Aıta keteıik, búgin Ortalyq kommýnıkatsııalar qyzmetindegi baspasóz máslıhatynda QR Prezıdenti Ákimshiligi Basshysynyń orynbasary Máýlen Áshimbaev Prezıdenttik jastar kadr rezervine engen 300 qazaqstandyqtyń anyqtalǵanyn málimdedi. Jeńimpazdardyń ortasha jasy 31-de.
