Prezıdenttik kadr rezerviniń jeńimpazy: bul joba qabiletti jastardy qanattandyrady

NUR-SULTAN. QazAqparat – Ótken jyly qolǵa alynǵan «Prezıdenttik jastar kadr rezervi» jobasynyń maqsaty – elge eńbek etip, óz isiniń sheberi atanǵan talantty jastardy anyqtaý. Alǵashqy baıqaýdyń nátıjesinde 300 otandasymyz kópten oza shyǵyp, úzdik atandy. Sonyń biri «Qazaqstandyq memlekettik-jekeshelik áriptestik ortalyǵy» AQ front keńsesiniń birinshi vıtse-prezıdenti Shynasyl Ernazar QazAqparat tilshisine atalǵan jobaǵa qatysýdyń ereksheligi men óziniń eńbek joly týraly aıtyp berdi.

«Prezıdenttik jastar kadr rezervine konkýrs arqyly endim. Atalǵan joba týraly ótken jyldyń tamyz aıynda jańalyqtardan estip, qyrkúıek aıynda qujat tapsyrdym. Túrli deńgeıdegi memlekettik tapsyrmalardy oryndaıtyn jas mamandar tobynyń jasaqtalatyny meni qyzyqtyrdy. Sodan qatysýǵa bel býdym. Baıqaýdyń árbir kezeńinen ótý men úshin mańyzdy boldy. Óıtkeni, synaq óte qıyn, biraq bári ashyq túrde ótti. ıAǵnı kez kelgen azamat baıqaýdyń ótý barysymen ashyq tanysa aldy. 2019 jyldyń jeltoqsan aıynda «prezıdenttik jastar kadr rezevrine óttińiz» degen SMS habarlama kelgende óte qýandym. Joba memleketke qyzmet etip, elge paıdamdy tıgizem deýshi talantty jastarǵa arnalǵan, bul - jaqsy múmkindik», - dedi Shynasyl Ernazar.

Onyń aıtýynsha, prezıdenttik jastar kadr rezervi jobasy jastardyń adal eńbek etip, qyzmettik ósýi barysynda erekshe ról atqarady.

«Joǵary bilimge kelsek, aldymen BAÁ-de qarjyger mamandyǵyn ıgerdim. Odan soń elge kelip, elordadaǵy Qazaq gýmanıtarlyq zań ýnıversıtetinde MVA boıynsha bilimimdi jetildirdim. Jumys barysy týraly aıtsam, men memlekettik qyzmette bolǵan emespin, degenmen kvazımemlekettik kompanııada eńbek ettim. Meniń jumysymnyń ereksheligi sol, bizdiń sala memleket pen bıznes arasyndaǵy kópir qyzmetin atqarady. Bizdiń elde qazir qalaı? Ne memleketke jumys isteısiń, ne bolmasa kásip qylyp óz-ózińe jumys isteısiń. Al bizdiń maqsat – osy eki jaqty bir-birimen baılanystyryp, ózara yntymaqtastyǵyna yqpal etý. Sonymen birge biz jeke ınvestorlarmen jumys istep, olardyń memleketke kómektesýin uıymdastyramyz», - dedi ol.

Sondaı-aq, joba jeńimpazy óziniń eńbek jolyna qatysty málimettermen de bólisti.

«Meniń alǵashqy eńbek ótilim, qazirgi kúni ózim vıtse-prezıdent bolyp otyrǵan uıymda taǵylymger bolýdan bastaldy. Ol 2013 jyl bolatyn, sodan beri mine 7 jyl boıy osy jerde qyzmet etip kelemin. Bir qyzyǵy, men bastapqyda osy jerge shtattan tys qyzmetker bolyp kirip, alǵashqy 3-4 aı tegin jumys istedim. Sodan bergi eńbektiń arqasynda búgingi dárejege jettim», - dedi Sh. Ernazar.