Prezıdenttik kadr rezerviniń músheleri basshylyq laýazymdarǵa taǵaıyndaldy

NUR-SULTAN. QazAqparat – Prezıdenttik jastar kadrlyq rezerviniń músheleri QR Aýyl sharýashylyǵy mınıstrliginde basshylyq laýazymdarǵa taǵaıyndaldy, dep habarlaıdy QazAqparat vedomstvoǵa silteme jasap.

Halyqaralyq yntymaqtastyq jáne ınvestıtsııa tartý departamentiniń dırektory qyzmetine Manasov Berik Jambyluly taǵaıyndaldy.

Berik Manasov Qazaq gýmanıtarlyq zań ýnıversıtetin bitirgen. Qarjy jáne qarjy quqyǵy salasynyń mamany. Eńbek jolyn 2005 jyly qarjy taldaýshysy bolyp bastaǵan. 2007-2008 jyldary qarjy uıymdarynda, 2008-2013 jyldary «Agrarlyq nesıe korporatsııasy» AQ-da túrli laýazymdardy atqardy. 2013-2014 jyldary – «Aýyl sharýashylyǵyn qarjylaı qoldaý qory» AQ bas menedjeri, keıin Qazynashylyq departamentiniń dırektory boldy. 2018 jyldan bastap «QazAgrogarant» AQ ishki baqylaý qyzmetiniń bastyǵy.

Sondaı-aq, Agrarlyq azyq-túlik naryqtary jáne aýyl sharýashylyǵy ónimderin qaıta óńdeý departamentiniń dırektory bolyp Hatepova Nazgúl Serikqalıqyzy taǵaıyndaldy.

Nazgúl Hatepova Jáńgir han atyndaǵy Batys Qazaqstan agrarlyq-tehnıkalyq ýnıversıtetin «Aýyl sharýashylyǵy» mamandyǵy boıynsha, sondaı-aq M.H. Dýlatı atyndaǵy Taraz memlekettik ýnıversıtetin «Quqyq» mamandyǵy boıynsha bitirgen. Aǵylshyn tilin erkin meńgergen. Eńbek jolyn 2012 jyly sarapshy laýazymynan bastap, Aýyl sharýashylyǵy mınıstrliginde túrli laýazymdarda tabysty jumys istedi.