Prezıdenttik kadr rezervine 180 áskerı qyzmetshi kirdi

NUR-SULTAN. QazAqparat - Prezıdenttiń kadrlyq rezervine 180 áskerı qyzmetshi kirdi, dep habarlaıdy QazAqparat QR Qorǵanys mınıstrliginiń resmı saıtyna silteme jasap.

Olardyń bári Qazaqstan Respýblıkasy Qarýly Kúshteriniń ofıtserleri men generaldary.

Prezıdenttik rezerv – bul Qarýly Kúshterdiń joǵary qolbasshylyǵyna usynylatyn ofıtserlerdiń tizimi. Jeltoqsan aıynda Qaýipsizdik Keńesiniń Hatshysy biliktilik synaqtarynan sátti ótken 155 ofıtser men 25 generaldyń tizimin bekitti.

Rezerv memlekettik basqarý júıesin jaqsartý úshin qurylǵan. Іrikteýdiń jańa júıesi joǵary laýazymdarǵa usyný úshin eń laıyqty úmitkerlerdi anyqtaýǵa múmkindik beredi. Mundaı tájirıbe Reseıde, AQSh-ta, Japonııada jáne basqa elderde sátti qoldanylady.

Oǵan Qorǵanys mınıstriniń qyzmettegi orynbasarlary, Bas shtab bastyǵynyń orynbasarlary, ásker túrleri men tekteriniń, óńirlik qolbasshylyqtar áskerleriniń bas qolbasshylary jáne olardyń orynbasarlary, ortalyq apparattyń qurylymdyq bólimsheleriniń bastyqtary, áskerı oqý oryndarynyń bastyqtary, áskerı bólimderdiń komandırleri, Ulttyq qorǵanys ýnıversıtetiniń magıstranttary jáne basqa da perspektıvaly basshylar kirdi.

Prezıdenttik rezervke qabyldaný úshin úmitkerler aqpannan mamyrǵa deıin kóp deńgeıli irikteýden ótti. Qorǵanys mınıstrliginiń Joǵary attestattaý komıssııasy arnaıy tekserý júrgizip, olardyń qyzmettik jumysynyń nátıjelerin, jetken jetistikterin, jeke jáne kásibı qasıetterin zerdeleıdi. Osydan keıin ǵana túpkilikti sheshim qabyldandy.

Prezıdenttik rezerv basshy laýazymdarǵa ornalasýǵa úmitkerlerge aǵymdyq jáne perspektıvalyq qajettiliktiń boljamy eskerip, jyl saıyn qalyptastyrylady.

Úmitker onda úsh jyldan artyq bolmaýy tıis. Merzim aıaqtalǵannan keıin joǵary attestattaý komıssııasy ony alyp tastaý nemese onyń qatysýyn uzartý týraly sheshim qabyldaıtyn bolady.