Prezıdenttik kadr rezervindegi 171 maman jumysqa alyndy

NUR-SULTAN. QazAqparat – QR Memlekettik qyzmet isteri agenttiginiń tóraǵasy Anar Jaıylǵanova Prezıdenttik kadr rezervshilerin jumysqa ornalastyrý týraly aıtyp berdi, dep habarlaıdy QazAqparat tilshisi.

«2019 jyly 300 adamnan quralǵan Prezıdenttik jastar kadr rezervi quryldy. 2020 jyly olardyń 57 % nemese 171 rezervshi memlekettik organdar men kvazımemlekettik sektor kompanııalaryndaǵy túrli pozıtsııalarǵa jumysqa ornalastyryldy. Basqa rezervshilerdi joǵary basqarýshylyq laýazymdarǵa taǵaıyndaý úshin olardyń mansaptyq satylardan ótýi arqyly jumys tájirıbesi men quzyretterin odan ári jetildirýi qajet. Osyǵan baılanysty arnaıy ázirlengen baǵdarlamalar boıynsha turaqty oqytýdy kózdeıtin rezervshilerdi damytýdyń jeke josparlary ázirlendi jáne bekitildi», - dedi A. Jaıylǵanova QR Memlekettik qyzmet isteri agenttiginiń Alqa otyrysynda.

Bıyl da Memleket basshysy Prezıdenttik kadr rezervine kezekti konkýrstyq irikteý júrgizýdi jáne oǵan jańa kózqarastar men bastamalary bar 50 kásibı menedjerdi qabyldaýdy tapsyrdy.

«Qazirgi ýaqytta Agenttik Prezıdenttiń tıisti Jarlyǵy jobasyn daıyndap, ony jarııa talqylaýǵa jáne múddeli memlekettik organdarmen kelisýge joldady. Osylaısha, aldyńǵy irikteý tájirıbesin eskere otyryp, kandıdattardyń qundylyq baǵdary boıynsha talaptar tujyrymdamalyq turǵydan qaıta qaraldy. Atap aıtqanda, rezerv qoǵamdyq múddelerge basymdyq beretin adamdar arasynan quralmaq. Rekrýtıng ózgertýler de naqty tájirıbesi bar transformatsııalyq kóshbasshylardy anyqtaýǵa baǵyttalǵan. Osyǵan baılanysty rezerv krıterııleri qaıta qaraldy», - dedi A. Jaıylǵanova.

Jumysqa ornalastyrýdy qamtamasyz etý úshin áleýetti jumys berýshiler qatarynan saraptamalyq komıssııa qurylady.