Prezıdenttik kadr rezervin joǵary laýazym úmitkerleri dep qaraýǵa bolmaıdy - Toqaev

NUR-SULTAN. QazAqparat – Prezıdenttik kadr rezervin joǵary laýazymǵa usynylatyn úmitkerler toby dep qaraýǵa bolmaıdy. Bul týraly búgin Jastar jylynyń jabylý jáne Volonter jylynyń ashylý saltanatynda Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«Bıyl biz prezıdenttik kadr rezervin jasaqtaımyz. Júzden júırik, myńnan tulpar shyqqan, birneshe synaqtan ótken tańdaýly jastar osy tizimge enedi. Oǵan tek bolashaqta joǵary laýazymǵa usynylatyn úmitkerler toby dep qaraýǵa bolmaıdy. Atalǵan joba eń aldymen jigerli jastardy elge shyn nıetimen adal qyzmet etýge yntalandyrýy tıis. Óz isin jetik biletin kásibı mamandardyń jańa býynyn qalyptastyrý basty mindet», - dedi Memleket basshysy.

Sondaı-aq, QR Prezıdenti bıyl ýnıversıtet spartakıadalarynyń qozǵalysy qaıta jańǵyrtylǵanyn, ulttyq sport túrlerin qoldaý jáne jas jazýshylardyń ádebıet akademııasyn ashý úshin naqty jumystar atqarylǵanyn aıtty.

«Jalpy qolǵa alynǵan barlyq bastamalar ózderińiz sııaqty qaıratty jastar úshin jasalyp otyr. Árıne, oıǵa alynǵan nárseniń bárin birden júzege asyrdyq dep aıtýǵa bolmas. Biraq, bul jumystardy aldaǵy ýaqytta mindetti túrde jalǵastyramyz», - dedi Qasym-Jomart Toqaev.