Prezıdenttik ádebı syılyqqa endi 35 jasqa deıingiler ótinish bere alady

ASTANA. QazAqparat – Jas jazýshylar men aqyndarǵa arnalǵan Prezıdenttik arnaýly ádebı syılyqqa endi 35 jasqa deıingi azamattar ótinish bere alady. «Ashyq» NQA portalynda jarııalanǵan Úkimet qaýlysyna osyndaı ózgeris engizilgen, dep habarlaıdy QazAqparat tilshisi.

«Ótinimderdi qabyldaý aıaqtalǵan kezde 18 ben 35 jas aralyǵyndaǵy Qazaqstan Respýblıkasynyń azamattary bolyp tabylatyn, buryn halyqaralyq jáne ulttyq baıqaýlarǵa qatyspaǵan týyndylary bar, qazaqstandyq ádebıetti damytý úshin shyǵarmashylyq áleýeti bar jas jazýshylar men aqyndar Prezıdenttik syılyqqa úmitker bola alady», - dep jazylǵan jańa redaktsııada.

Aıta keteıik, buryn bul syılyq 29 jastan aspaǵan azamattarǵa beriletin.

Ótinish joldaý úshin jas jazýshylar men aqyndar 30 maýsymǵa deıin ýákiletti organǵa qaǵaz jáne elektrondyq túrde myna qujattardy usynýy tıis:

- Prezıdenttik syılyq alýǵa ótinim;

- úmitkerdiń jeke kýáliginiń kóshirmesi;

- Qazaqstan Jazýshylar odaǵynyń Prezıdenttik syılyqqa úmitkerge shyǵarmashylyq minezdemesi;

- Prezıdenttik syılyqqa úmitker jarııalaǵan ne úmitker týraly maqalalardyń, jarııalanymdardyń kóshirmesi;

- ekinshi deńgeıdegi bankte bank shotynyń bar ekenin rastaıtyn anyqtamanyń kóshirmesi;

- úmitkerdiń jetistikterin aıǵaqtaıtyn ózge de materıaldar.

Qujat 29 naýryzǵa deıin kópshilik talqylaýda bolady.

Qosa ketsek, endi «Daryn» jastar syılyǵyna da 35 jasqa deıingi azamattar ótinish bere alady.

Eske salaıyq, byltyr 8 jeltoqsanda Senat 35 jasqa deıingilerdi «jastar» sanatyna engizý týraly zań jobasyn maquldaǵan edi.