Prezıdentti saılaý arqyly bolashaǵymyzdy aıqyndaımyz: Munaıshylar daýys berdi

AQTAÝ. QazAqparat - Mańǵystaý munaıshylary Qazaqstan Respýblıkasy Prezıdentiniń kezekten tys saılaýynda óz tańdaýlaryn jasap jatyr. Óndiristik tsehtardyń eńbek ujymdary judyryqtaı jumylyp, el bolashaǵy úshin daýys berý maqsatynda saılaý ýchaskesine bardy, dep habarlaıdy QazAqparat tilshisi.

«Prezıdentti saılaý arqyly bolashaǵymyzdy aıqyndaımyz. Munaıshylardyń saılaýǵa belsendi qatysyp, ózderiniń konstıtýtsııalyq quqyǵyn paıdalanǵany qýantady. Men Qazaqstannyń bolashaǵy jarqyn bolady dep senemin», - dedi munaıshy Edil Bekmuratov.

Vahtadaǵy Mańǵystaý munaıshylary tańǵy 6-dan bastap saılaý ýchaskelerine baryp daýys berdi.

«Búgin Qazaqstan úshin mańyzdy naýqan ótip jatyr. El bolashaǵynyń jarqyn bolýyna septigin tıgizedi dep oılaımyn. Saılanǵan Prezıdentimizdiń jumysynyń jaqsy bolýyn halyq bolyp tileımiz», - dedi munaıshy Hasan Bektileý.

«QR Prezıdenttiginiń saılaýynda men óz daýysymdy berdim. Ár adam óz azamattyq kózqarasyn bildirýge quqyly dep oılaımyn», - dedi munaıshy Nur Turarbekuly.

Baıqaýshylar saılaýshylardyń daýys berýge qarqyndy qatysyp jatqanyn, uıymdastyrý deńgeıiniń joǵarylyǵyn aıtyp otyr. Jalpy saılaýda patrıotızm men birlik rýhy anyq seziledi.

Aıta ketý kerek, vahtaaralyq demalysta júrgen munaıshylar men ortalyq keńse qyzmetkerleri turǵylyqty jeri boıynsha ýchaskelerde daýys berýde.