Prezıdentter Elektrondyq úkimet salasyndaǵy yntymaqtastyq jetistikterimen tanysty
DÝShANBE. KAZINFORM – Qasym-Jomart Toqaev pen Emomalı Rahmonǵa bıyl eki eldiń mamandary Internet-resýrstardyń biryńǵaı platformasy men SmartBridge júıeleriniń negizgi komponentterin Tájikstan serverlerinde sátti ornalastyrǵany jóninde baıandaldy. Bul týraly Aqordanyń baspasóz qyzmeti málim etti.
Qazaqstannyń Tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıev pen Tájikstannyń Innovatsııalar jáne tsıfrlyq tehnologııalar agenttiginiń dırektory Mırzo Hýrshed tájik mamandarynyń arnaıy oqý kýrsynan ótkenin jetkizdi. Qazir Tájikstannyń memlekettik organdaryna arnalǵan saıttardy ázirleý jumystary qolǵa alynyp, IT-sheshimderdi ıntegratsııalaý isi egjeı-tegjeıli pysyqtalyp jatyr.
Qasym-Jomart Toqaev pen Emomalı Rahmonǵa memlekettik qyzmetterdiń qoljetimdiligin jáne tıimdiligin arttyrý úshin jasandy ıntellekt tehnologııalaryn paıdalaný múmkindikteri jaıynda málimet berildi. Bul eki el arasyndaǵy yntymaqtastyqtyń eń perspektıvti baǵytynyń biri bolmaq.
Qasym-Jomart Toqaev Tájikstan Respýblıkasyna memlekettik saparmen barǵanyn jazǵan bolatynbyz.
Qasym-Jomart Toqaevty «Qasrı Mıllat» saraıynda Tájikstan Prezıdenti Emomalı Rahmon qarsy aldy.
Qazaqstan men Tájikstan prezıdentteri shaǵyn quramda kelissóz júrgizdi.
