Prezıdentten syıaqy alǵan oqýshy álemniń №1 ýnıversıtetine tústi
ASTANA. KAZINFORM - «NURORDA» mektep-lıtseıiniń oqýshysy Nurgúl Egenbergenova álemdik bilim berý reıtınginde kósh bastap turǵan eń bedeldi oqý orny - Massachýsets tehnologııalyq ınstıtýtyna (MIT, AQSh) oqýǵa qabyldandy.
«NURORDA» mektep-lıtseıi baspasóz qyzmetiniń habarlaýynsha, bul - qazaqstandyq jas zııatkerlerdiń halyqaralyq arenadaǵy básekege qabilettiligin dáleldeıtin aıtýly oqıǵa.
MIT ýnıversıtetine túsý - álemdik deńgeıdegi eń qıyn synaqtardyń biri bolyp sanalady. Máselen, bıylǵy oqý jylynda 29 myńnan astam úmitkerdiń ishinen tek 4-5%-y ǵana shaqyrtý alǵan. Al sheteldik stýdentter úshin irikteý budan da qatań bolyp, qabyldaný deńgeıi nebári 2%-dy qurady.
Nurgúldiń erekshe akademııalyq jetistikteri men ıntellektýaldyq áleýetin tek MIT qana emes, sonymen qatar álemniń top-100 tizimine kiretin taǵy 5 jetekshi ýnıversıteti moıyndap, shaqyrtý jibergen. Olardyń qatarynda myna oqý oryndary bar:
● University of British Columbia (UBC, Kanada) - №38;
● Hong Kong University of Science and Technology (HKUST, Gonkong) - №44;
● École Polytechnique (Frantsııa) - №46;
● Korea Advanced Institute of Science and Technology (KAIST, Ońtústik Koreıa) - №53;
● University of Warwick (Ulybrıtanııa) - №74.
Aıta keteıik, Nurgúl Egenbergenova buǵan deıin de bilim men ǵylym salasyndaǵy eren eńbegi úshin memleket deńgeıinde joǵary baǵalanǵan bolatyn. Ol Qazaqstan Respýblıkasynyń Prezıdenti Qasym-Jomart Toqaevtyń jeke qabyldaýynda bolyp, Memleket basshysynyń qolynan arnaıy syıaqy sertıfıkatyn ıelengen.
