Prezıdentte moratorıı jarııalaý quqyǵy qalady
ASTANA. QazAqparat - Konstıtýtsııa ózgeristeri Qazaqstan Prezıdentiniń moratorıı jarııalaý quqyǵyna áser etpeıdi. Bul jaıynda búgin Parlament palatalarynyń birlesken otyrysynda QR Prezıdenti Ákimshiliginiń basshysy Ádilbek Jaqsybekov málim etti, dep habarlaıdy QazAqparat.
Otyrys barysynda Májilis depýtaty Azat Perýashev Prezıdenttiń zańdyq kúshi bar Jarlyqtar shyǵarý quqyǵyn joıý máselesine kúdik keltirdi.
«Qoldanystaǵy Konstıtýtsııa Prezıdentke zańdyq kúshi bar Zańdar nemese Jarlyqtar shyǵarý quqyǵyn berdi. Túzetýler jobasynda Konstıtýtsııanyń 45-baby 2-tarmaǵynan bul quqyqty joıý usynylady. Degenmen táýelsizdik jyldarynda Prezıdent úsh márte moratorıı jarııalap, daǵdarys kezeńinde ol kásipkerlikke aıtarlyqtaı qoldaý boldy. Tipti olardyń keıbirin quldyraýdan qutqaryp qaldy. Búginde bıznestiń osy máselege baılanysty qaýpi bar. Prezıdenttiń moratorıı jarııalaý quqyǵy saqtala ma? Jáne ol qandaı normalar negizinde saqtalmaq?» - dep surady ol Jaqsybekovten.
Prezıdent ákimshiliginiń basshysy óz kezeginde Prezıdenttiń mundaı quqyǵy saqtalatyndyǵyn basa aıtty.
«Konstıtýtsııanyń 45-baby 1-tarmaǵyna sáıkes Respýblıka Prezıdenti Konstıtýtsııa men Zańdar negizinde eldiń búkil aýmaǵynda mindetti kúshi bar Jarlyqtar men Ókimder shyǵarady. Siz atap ótken moratorıı osyndaı Jarlyqtarmen bekitiledi. Bul quqyq Prezıdentte saqtalady», - dedi ol.
