Prezıdentti álem kóshbasshylary Qurban aıt merekesimen quttyqtady
ASTANA. KAZINFORM – Prezıdent Qasym-Jomart Toqaevtyń atyna Qurban aıt merekesine oraı shet memleketterdiń basshylary men halyqaralyq uıymdardyń jetekshilerinen quttyqtaý hattary kelip túsip jatyr. Bul týraly Aqorda habarlady.
Ózbekstan Prezıdenti Shavkat Mırzıeev Qurban aıt tarıhy men tili, dini men dástúri ortaq halyqtar arasyndaǵy baýyrlastyqty odan ári nyǵaıta túsetinin atap ótken.
– Birlesken kúsh-jigerdiń nátıjesinde eki eldiń strategııalyq seriktestigi men odaqtastyǵy bekı túsetinine senimdimin, – delingen jedelhatta.
Qyrǵyzstan Prezıdenti Sadyr Japarov Qurban aıtty rýhanı tazarýdyń, qaıyrymdylyq pen yntymaqtastyqtyń belgisi retinde sıpattaǵan.
– Bul qasterli meıram tarıhtan tamyr tartatyn dostyǵymyzdy, baýyrlastyǵymyzdy, halyqtarymyz arasyndaǵy ózara qurmetti arttyra beretinine senimim mol, – dep jazylǵan quttyqtaýda.
Tájikstan Prezıdenti Emomalı Rahmon atalǵan merekeniń elder arasynda dostyqty, tıimdi yntymaqtastyq pen túsinistikti nyǵaıtýdaǵy mańyzyna toqtalǵan.
– Qasterli meıram ǵasyrlar boıy halyqtarymyzdy izgilikke, jomarttyqqa, ádildikke, ózgege kómek qolyn sozýǵa úndep keledi, – dep jazylǵan Tájikstan Prezıdentiniń quttyqtaýynda.
Túrikmenstan Prezıdenti Serdar Berdimuhamedov senim men janashyrlyq saltanat quratyn qasterli mereke kúlli musylman úmbetin biriktiretinin jazǵan.
– Ortaq rýhanı qundylyqtarǵa degen umtylys halyqtarymyz arasyndaǵy dostyq pen yntymaqtastyqty nyǵaıtýǵa yqpal ete beretinine kúmánim joq, – delingen jedelhatta.
Qurban aıt meıramyna oraı ózderiniń izgi tilekterin Ázerbaıjan Prezıdenti Ilham Álıev, BAÁ Prezıdenti sheıh Muhammed ben Zaıd Ál Nahaıan, BAÁ Vıtse-prezıdenti, Premer-mınıstri, Dýbaı Ámirshisi sheıh Muhammed ben Rashıd Ál Maktým, Kýveıt Ámiri sheıh Mıshaal ál-Ahmad ál-Djaber as-Sabah, Kýveıttiń Taq murageri Sabah Halıd ál-Hamad as-Sabah, Bahreın Koroli Hamad ben Isa Ál Halıfa, Aljır Prezıdenti Ábdelmájıd Tebbýn, Aýǵanstan Premer-mınıstri Mohammad Hasan Ahýnd, Islam yntymaqtastyǵy uıymynyń bas hatshysy Hısseın Brahım Taha, ISESKO bas dırektory Salım ben Muhammed ál-Malık, TÚRKSOI Bas hatshysy Sultan Raev jáne taǵy basqalar joldady.
Quttyqtaý hattary áli de kelip túsip jatyr.
Memleket basshysy Qasym-Jomart Toqaevtyń el turǵyndaryn Qurban aıt merekesimen quttyqtaǵan edi.
