«Prezıdentpen baılanys ortalyǵy ashyldy» - respýblıkalyq basylymdarǵa sholý
ASTANA. Qazannyń 31-i. /QazAqparat/ - Qazaq aqparat agenttigi respýblıkalyq basylymdarda qazannyń 31-i, senbi kúni shyqqan ózekti materıaldarǵa sholýdy usynady.
Keshe Premer-Mınıstr Kárim Másimov Ońtústik Qazaqstan oblysynda ekonomıkany modernızatsııalandyrý boıynsha úkimettik komıssııanyń kóshpeli májilisin ótkizdi. Osyǵan oraı «Egemen Qazaqstan» gazetiniń senbilik sanynda «Myqtylyqtyń ózegi - óndiriste» degen taqyryppen maqala jaryq kórdi. Onda «Máselen, farmatsevtıka salasynda jýyq jyldarda úlken jaqsy jańalyqtar bolady. Elbasymyz 2014 jylǵa deıin elimizdegi dári-dármektiń elý paıyzyn óz Otanymyzda daıyndaýdy «Nur Otan» HDP-nyń XІІ sezinde Úkimet aldyna másele etip qoıǵan. Osyǵan oraı medıtsına salasyna mamandanǵan zaýyttar aıasyn keńeıtý bastalyp ketti. Búgingi tańda «Hımfarm» AQ otandyq óndirýshilerdiń arasynda kóshbasshy. Qazaqstanda óndiriletin farmatsevtıkalyq ónimniń jalpy kóleminiń 65 paıyzyn alyp otyrǵan «Hımfarm» AQ endi Shymkent pen Almatyda jańa 2 zaýyt salady. Al, «Romat» kompanııasy Pavlodar men Semeıde úsh tsehty iske qossa, «Globlfarm» Almaty oblysynda jańa zaýytty, al «Nobel» men «Fıtohımııa» kompanııalary úsh kezektik jańa jelilerdi iske qospaq», delingen.
Osy basylymnyń «Parlament» atty arnaýly betinde Májilis depýtaty Berik Bekjanovtyń «Sezikti buryn sekiredi» atty maqalasy jaryq kórdi. «Degenmen de, búginde elimizde halyq densaýlyǵyna keri áserin tıgizetin «shóptik mıkster» satylýda. Erkin satylyp jatqan ósimdik qospalary nemese túsinikti tilmen aıtsaq, shóptik «mıksterdiń» áseri anashamen birdeı. Quramynda esirtki qataryna jatatyn zattar bolǵandyqtan, jýyrda ǵana Reseı shóptik «mıksterdi» satýǵa tyıym salǵan bolatyn. Sebebi, shóptik qospalardyń quramynda tabylǵan zattar marıhýana men anashanyń negizgi quramdas bóligi bolyp tabylady. Endi Gollandııada óndiriletin bul qospa soltústiktegi kórshimizdi aınalyp ótip, Qazaqstanǵa tasymaldanýda. Ázirge «shóptik mıksterge» bizdiń elde tyıym salynbaǵan», deıdi depýtat.
«Jalpy, memlekettik organdardaǵy qazaq tiliniń jaǵdaıy sol vedomstvodaǵy memlekettik til qurylymynyń jumysyna tikeleı baılanysty. Alaıda, memlekettik organdardyń barlyǵynyń 2010 jyldan keshikpeı memlekettik tilge kóshýine oraı, «memlekettik til qurylymdarynyń qajeti shamaly, áskerı salada olar qosalqy sanattaǵy qyzmet» degen syqyldy pikirler de qylań berip júr. Sondaı pikirlerdiń kesirinen jáne daǵdarys saldary degen syltaýmen 2008 jyly Qorǵanys mınıstrligi Áýe qorǵanysy kúshteriniń ózinde memlekettik tildi damytý tárizdi memlekettik mańyzdy qyzmettiń teń jartysy qysqaryp ketti», deıdi Qorǵanys mınıstrligi Áýe qorǵanysy kúshteriniń Bas qolbasshylyǵy memlekettik tildi damytý bóliminiń bastyǵy Serik Bákir. Qorǵanys mınıstrligindegi qazaq tiliniń jaı-kúıin bilgińiz kelse «Egemen Qazaqstan» basylymynda jaryq kórgen «Aýdarmashyǵa ǵana ıek artpaıyq» atty maqalany oqyńyz.
**
Qarashanyń 13-i kúni Memleket basshysy Nursultan Nazarbaev Qazaqstan halqynyń ózderin tolǵandyrǵan saýaldaryna jaýap beredi. Osyǵan oraı keshe elordadaǵy Beıbitshilik jáne kelisim saraıynda Prezıdentke joldanatyn saýaldardy qabyldaıtyn arnaıy baılanys ortalyǵy ashylyp, jumysyn bastaǵan bolatyn. «Aıqyn» basylymynyń jazýynsha, Nursultan Nazarbaev sol kúni «Qazaqstan», «Habar», «Astana qalalyq teledıdary» jáne «Qazaq radıosy», «Astana qalalyq radıosy» boıynsha ótetin tikeleı efırde azamattardyń teleefır, telefon, ınternet habarlamalary arqyly túsken suraqtaryna jaýap beredi. Shaǵyn maqala basylymnyń senbilik sanynda «Prezıdentpen baılanys ortalyǵy ashyldy» degen taqyryppen berilgen.
Osy jaıt «Egemen Qazaqstan», «Komsomolskaıa pravda», «Ekspress K» gazetteriniń nazarynan da tys qalmaǵan.
«Endeshe, «bıýdjette aqsha joq» degen syltaýdan arylyp, qaıtken kúnde de jalaqy ósimin qańtardyń 1-inen bastaýymyz kerek. Bul jalaqysy ósetin muǵalimder men dárigerler nemese sheneýnikter úshin qajet emes, túptep kelgende memleket úshin qajet. Eger osy memlekettik qajettilikti der kezinde durys túsine almasaq, basqany bylaı qoıǵanda, qarapaıym halqymyzdyń keden odaǵy sekildi ádemi isimizdiń ózine kúmánmen, kúdikpen, tipti jekkórýshilikpen qaraýy múmkin», dep jazady «Aıqyn» basylymy. Bul másele osy gazette «Kedendik odaq kúıretip ketpesin desek, Elbasymyzdyń jalaqy ósimi jónindegi tapsyrmasyn der kezinde oryndaý qajet» degen maqalamen berilgen. Jazylǵan jaıt tóńireginde egjeı-tegjeıli basylymnyń búgingi sanynan bile alasyz.
«Aıqyn» basylymynyń «Aq sóıle!» atty turaqty aıdarynyń qonaǵy - S.Asfendııarov atyndaǵy QazUMÝ farmatsevtıka fakýltetiniń dekany Kelesbek Abdýllın. Aıdar qonaǵy basylymnyń elimizdegi dári-dármek salasyna qatysty birqatar saýaldaryna naqty jaýap bergen. Suhbat barysynda K.Abdýllın «ekinshi bir kózge jyly ushyraǵany - farmatsevtıka salasynda jańa bir laýazym paıda bolyp otyr. Ol - farmatsevtıka salasynyń bas memlekettik ınspektory. Buǵan deıin ınspektor laýazymy bir sanıtarııa salasynda ǵana bar bolatyn. Bul laýazymnyń bereri sol - mınıstrlikte búkil farmatsevtıka salasyna jaýap beretin bir tulǵa qyzmet etedi. Onyń jaýapkershilik júgi, árıne, óte aýyr, biraq sonymen birge quzyry da úlken. Soǵan saı farmatsevtıka salasynyń túıini tarqatylmaı júrgen kóp máselesi endigi ýaqytta sheshiletin bolady degen úmittemiz», depti. Ekeýara áńgime «Otandyq dári óndirýshilerge salyq jóninen jeńildikter qajet» degen taqyryppen berilgen.
***
Beısenbi kúni Qazaqstanǵa jumys saparymen kelgen Ingýshetııa prezıdenti ıÝnýsbek Evkýrov elorda ákimi Imanǵalı Tasmaǵambetovpen júzdesti. Bul jaıynda «Astana aqshamy» gazetinde jaryq kórgen «Qyzýqandy taý halqy yntymaqtasýǵa peıil» atty maqalada jazylǵan. Jarııalanymda Ingýshetııa prezıdentiniń «Biz jumys saparymyz barysynda osyndaǵy ıngýsh baýyrlarymyzben júzdestik. Qandastarymyzdyń tirshiligi kóńilimizdi marqaıtty. Olar qazaq halqynyń jaqsylyǵyn kóp aıtty. Qazaqstandy júrekterine uıalatqany kórinip tur. Basynda «Otanym, Otanym» dep turǵanda «qaı el týraly aıtyp tur, Ingýshetııany ma?» dep oılap qaldym. Kezinde taǵdyrdyń talaıymen Qazaqstanǵa kelgen ıngýshterdi jatyrqamaı, baýyryna tartyp, pana bolǵan qazaq halqyna dán rızamyz», degen sózi keltirilgen.
Ingýshetııa prezıdentiniń Astana qalasy ákimimen júzdesýi jaıyndaǵy kólemdi maqala «Vechernıaıa Astana» gazetinde de bar.
Eýropa halyqtary arasynda júrgizilgen dárigerlik zertteý nátıjesinde 10 jyldan artyq uıaly telefon ustaǵan jandarda mıdyń qaterli isigi jıi kezdesetindigi belgili bolyp otyr. Osyǵan oraı «Astana aqshamy» basylymy telefonnan tóner qaýip qandaı degen saýaldy bilikti mamandarǵa qoıǵan. Elimizdiń mamandarynyń pikirin osy basylymnyń senbilik sanynan tolyǵymen oqı alasyz.
***
«Internetke 40 jyl», dep jazady «Ekspress K» gazeti. Bir-birinen qashyq ornalasqan kompıýterler arasyndaǵy jelilik baılanys alǵash ret 1969 jyly qazannyń 29-ynda ornatylǵan bolatyn. Qazirgi ınternettiń bastapqy áskerı jelisi Arpanet («internetting»- «jeliaralyq» sózi tek 1977 jyly ǵana paıda bolǵan) arqyly baılanys jasalǵan bolatyn.
«Ekspress K» gazetiniń jazýynsha, Qazaqstan men Reseı ózara tranzıttik júk tasymal boıynsha bir-birine ońtaıly tarıftik jaǵdaı jasaýǵa daıyndalýda. Qazaqstannyń astanasyna saparlap kelgen Reseı Úkimeti tóraǵasynyń orynbasary Igor Sechın Premer-Mınıstr Kárim Másimovpen, onyń birinshi orynbasary Ómirzaq Shókeevpen júzdesip, birqatar ekijaqty yntymaqtastyq máselelerin talqyǵa salǵan. Maqalada «Qazaqstan temir jolymen Reseı júkterin jáne Reseı temir jolymen Qazaqstannyń júkterin tasymaldaýda ońtaıly tarıftik jaǵdaı usyný týraly áńgime boldy», degen Ó.Shókeevtiń sózi keltirilgen.
«Vremıa» gazetiniń jazýynsha, keshe Eńbek jáne halyqty áleýmettik qorǵaý mınıstri Gúlshara Ábdihalyqova regresshilerdiń máselelerin sheshý úshin jumys saparymen Qaraǵandy jáne Temirtaý qalalarynda bolǵan.
