Prezıdentke Joǵary aýdıtorlyq palatanyń 2026 jylǵa arnalǵan jospary tanystyryldy

ASTANA. KAZINFORM — Memleket basshysy Joǵary aýdıtorlyq palatanyń tóraǵasy Álıhan Smaıylovty qabyldady. Bul týraly Aqordanyń baspasóz qyzmeti habarlady.

Aqorda taratqan aqparatqa sáıkes, Qasym-Jomart Toqaevqa vedomstvonyń bıylǵy toǵyz aıdaǵy qyzmetiniń esebi jáne 2026 jylǵa arnalǵan jospary tanystyryldy. 

Álıhan Smaıylov memlekettik aýdıtorlar jalpy quny 32 trıllıon teńge bolatyn 18 iri tekserý júrgizgenin aıtty. Bul 2024 jyldyń sáıkes kezeńimen salystyrǵanda 22,8 trıllıon teńgege kóp.

— Prezıdentke memleket paıdasyna 112 mıllıard teńge óndirilgeni týraly málimet berildi. Anyqtalǵan kemshilikterdi joıý úshin Úkimetke jáne aýdıt nysandaryna 96 usynym men 800-ge jýyq oryndalýǵa mindetti nusqama jiberildi. Aýdıt qorytyndysy boıynsha 42 materıal quqyq qorǵaý organdaryna joldandy, — delingen habarlamada.

Álıhan Smaıylov Joǵary aýdıtorlyq palatanyń qyzmetin tsıfrlandyrý sheńberinde aýdıtorlyq jumystyń barlyq kezeńin avtomattandyratyn aqparattyq júıe engizilgenin jetkizdi. Vedomstvo kelesi jyly 40-qa jýyq aýdıtorlyq tekseris júrgizýdi josparlap otyr. Atap aıtqanda, tekserý jumystary otandyq farmatsevtıkalyq ónim óndirýshilerdi qoldaý, ınvestıtsııa tartý, avtomobıl joldaryn damytý, memlekettik aqparat saıasaty baǵyttaryn, «Qazaqtelekom» AQ, «Qazposhta» AQ jáne Іshki ister mınıstrliginiń Qylmystyq atqarý júıesi komıtetin, sondaı-aq basqa mekemelerdi qamtıdy. 

Kezdesý sońynda Qasym-Jomart Toqaev memlekettik aýdıtti jetildirý boıynsha birqatar naqty tapsyrma berdi. 

Budan buryn Aqordada Qazaqstanda padel sportyn damytý perspektıvasy talqylandy.