Prezıdentke vıdeo-habarlama joldaǵan «Qazatomónerkásip» jumysshylarynyń máselesi sheshildi

NUR-SULTAN. QazAqparat - «Qazatomónerkásip» UAK» AQ jalaqylarynyń qysqarýyna baılanysty Qazaqstan Prezıdentine vıdeojazba joldaǵan jumysshylardyń máselesi tolyqtaı sheshilgenin málim etti, dep habarlaıdy QazAqparat tilshisi.

«Ústimizdegi jyldyń 13 sáýiri kúni áleýmettik jelilerde «Taýkent-Energoqyzmet» JShS-niń birqatar qyzmetkeriniń Qazaqstan Respýblıkasynyń Prezıdentine joldaǵan úndeýine qatysty tómendegini habarlaımyz. 2017 jyldyń qazan aıynda «ORTALYQ» ÓK» JShS («Qazatomónerkásip» UAK» AQ enshiles kásiporny) óziniń damý baǵdarlamasyna sáıkes «Ýchaskeni jylýmen jáne sýmen qamtamasyz etý boıynsha qyzmetter» beıindi emes qyzmet baǵytyn aýtsorsıngke ótkizdi. Qyzmetti aýtsorsıngke ótkizý sharasy tolyǵymen Qazaqstan Respýblıkasynyń zańnamasyna sáıkes júrgizildi. «ORTALYQ» ÓK» JShS kenishtiń káriz júıesi men ýchaskeni jylýmen qamtamasyz etý qondyrǵysyna tehnıkalyq qyzmet kórsetý boıynsha «Taýkent-Energoqyzmet» JShS-men bir jyldyq kelisimshart jasady. Kelisimshartta ekinshi tarap buǵan deıin ýchaskedegi jumystardy atqaryp kelgen «ORTALYQ» ÓK» JShS-nyń 31 qyzmetkerin 1 jyldyq merzimde jumyspen qamtyp, aılyǵyn saqtap, áleýmettik mindetterdi oryndaıdy dep kórsetilgen. Ol mindetter tolyqtaı oryndaldy», - dep atap ótti kompanııanyń Qoǵammen baılanys jáne ishki kommýnıkatsııalar departamentinen.

Qoǵammen baılanys departamentiniń málimetinshe, 2019 jyldyń aqpan aıynan bastap qoldanystaǵy «Jumysshylardyń eńbekteri men kásipteriniń biryńǵaı tarıftik-biliktilik anyqtamalyǵy» talaptaryna sáıkes razrıad ózgerisine, jáne soǵan baılanysty aılyq tarıftik mólsherlemeniń qysqarýyna baılanysty kásiporynnyń birqatar jumysshylarynyń aılyq aqysy tómendetildi.

«Aılyq tarıftik mólsherlemege qosymsha «Taýkent-Energoqyzmet» JShS aı saıyn Eńbekaqy jáne materıaldyq yntalandyrý týraly ishki ereje men Qazaqstan Respýblıkasynyń qoldanystaǵy zańnamasy qarastyratyn barlyq tólemaqylardy júzege asyrady. «Qazatomónerkásip» UAK» AQ áleýmettik jaýapty kompanııa retinde barlyq tıesili is-sharalardy ótkizdi, atalmysh eńbek daýyna qatysty máseleler 2019 jyldyń 15 sáýirindegi ahýal boıynsha óz sheshimin tapty», - dep atap ótti «Qazatomónerkásipten».

Buǵan deıin QR Eńbek jáne halyqty áleýmettik qorǵaý mınıstrligi «Qazatomónerkásip» kompanııasynyń birneshe qyzmetkeriniń jalaqylaryn qysqartýǵa jáne razrıadyn tómendetýge qatysty narazylyq tanytýyna baılanysty tekserý júrgizetindigin habarlaǵan edik.