Prezıdentke Shymkent qalasynyń perspektıvti qurylys jospary tanystyryldy

ShYMKENT. KAZINFORM — Memleket basshysyna Qasym-Jomart Toqaevqa Shymkenttegi perspektıvti qurylys jospary tanystyryldy. Bul týraly Aqordanyń baspasóz qyzmeti habarlady. 

Memleket basshysyna qalanyń sáýlettik kelbetin jaqsartyp, turǵyn úı-kommýnaldyq sharýashylyǵyn damytý baǵytynda atqarylyp jatqan jumystar jóninde málimet berildi.

Qasym-Jomart Toqaev 2022 jyly Shymkent jurtshylyǵymen kezdesý barysynda shahardyń bas josparyn qaıta qarap, kólik-logıstıka ınfraqurylymy men ınjenerlik jelilerin jańǵyrtý týraly tapsyrma bergen bolatyn. Memleket basshysyna qaladaǵy Ortalyq stadıonnyń, perınataldyq ortalyqtyń, paralımpıadashylarǵa arnalǵan sport kesheniniń, mektepterdiń jáne taǵy da basqa áleýmettik nysandar qurylysynyń perspektıvti jobalary kórsetildi.

Prezıdentke jekemenshik turǵyn úı keshenderiniń beı-bereket ósýine shekteý qoıyp, 2035 jylǵa deıin kópqabatty úılerdiń úlesin 60 paıyzǵa jetkizý jospary jóninde baıandaldy.

Bıyl shamamen 1,4 mıllıon sharshy metr baspanany paıdalanýǵa berý kózdelgen. Onyń ishinde 320 myń sharshy metrden astam páter memlekettik bıýdjet esebinen salynady. Qalada jańadan «Aqjaıyq», «Bozaryq» jáne «Turan» shaǵyn aýdandary paıda boldy.